كەزدەسۋ بارىسىندا اتوم ەنەرگەتيكاسى ماسەلەسى قوزعالعان.
مەملەكەت باسشىسى قاسىم-جومارت توقايەۆتىڭ فرانسياعا جاساعان رەسمي ساپارىنىڭ باسىم باعىتتارىنىڭ ءبىرى ەكونوميكالىق ىنتىماقتاستىق بولدى. بۇل تۋرالى پرەزيدەنتتىڭ باسپا ءسوز حاتشىسى رۋسلان جەلدىباي الەۋمەتتىك جەلىدە جازدى، دەپ حابارلايدى Almaty-akshamy.kz.
«مەملەكەت باسشىسى فرانسيانىڭ جەتەكشى كومپانيالارىنىڭ باسشىلارىمەن ءبىرقاتار كەزدەسۋ وتكىزدى. كەزدەسۋدە ساۋدا، ينۆەستيسيا، ونەركاسىپ، كولىك-لوگيستيكا جانە ەنەرگەتيكا سالالارىنداعى ماسەلەلەر جان-جاقتى تالقىلاندى.
مۇناي-گاز سالاسىندا ءىرى كاسىپورىن سانالاتىن Total Energies كومپانياسى ەلىمىزگە 12 ملرد دوللار ينۆەستيسيا قۇيعان. ديرەكتورلار كەڭەسىنىڭ ءتوراعاسى پاتريك پۋياننە پرەزيدەنتكە ونىڭ كومپانياسى قازاقستاندا تاعى بىرنەشە اۋقىمدى جوبانى جۇزەگە اسىرۋعا نيەتتى ەكەنىن جەتكىزدى. اتاپ ايتقاندا، قۋاتى 1 گۆت-تىق جەل ەلەكتر ستانسياسىنىڭ قۇرىلىسى ءسوز بولدى. نىسان 2026-2027 جىلدارى قازاقستاننىڭ وڭتۇستىك-شىعىسىندا پايدالانۋعا بەرىلەدى. جوبانىڭ بولجامدى قۇنى – 1،9 ميلليارد دوللار.
Air Liquide حيميا كومپانياسىنىڭ پرەزيدەنتى فرانسۋا جاكوۆ مەملەكەت باسشىسىنا ونىڭ كومپانياسى قازاقستاندا جالپى ينۆەستيسيا كولەمى 120 ميلليون ەۋرو بولاتىن جوبالاردى ىسكە اسىرعانى تۋرالى ايتىپ بەردى. كومپانيانىڭ قاتىسۋىمەن قۇرىلعان بىرلەسكەن كاسىپورىن اتىراۋ مەن پاۆلودارداعى مۇناي وڭدەۋ زاۋىتتارىنىڭ نەگىزىندە تەحنيكالىق گاز ءوندىرىسىن جولعا قويدى.
Oranو S.A. كومپانياسى ديرەكتورلار كەڭەسىنىڭ ءتوراعاسى كلود يموۆەن KATCO بىرلەسكەن كاسىپورنى قازاقستاندا جىلدىق ۋران ءوندىرىسىنىڭ 15% جانە الەمدىك ءوندىرىستىڭ 7% وندىرەتىنىن جەتكىزدى. Orano S.A. – فرانسيا اتوم ونەركاسىبى سالاسىنىڭ كوشباسشىسى»، دەپ جازدى رۋسلان جەلدىباي.
سونداي-اق Électricité de France (EDF) باس ديرەكتورى ليۋك رەمونمەن بولعان كەزدەسۋ بارىسىندا اتوم ەنەرگەتيكاسى ماسەلەسى قوزعالعانىن ايتتى.
«پرەزيدەنت ليۋك رەمونمەن اتوم ەنەرگەتيكاسىنا وزىق تەحنولوگيالاردى ەنگىزۋ پەرسپەكتيۆالارىن قاراستىردى. اتالعان ماسەلە ەلىمىزدە اەس سالۋ جوسپارى تۇرعىسىنان وزەكتى. سونداي-اق جاڭارتىلاتىن ەنەرگيا كوزدەرى سالاسىنداعى جوبالاردى ىسكە اسىرۋ مۇمكىندىكتەرى تالقىلاندى.
Alstom كومپانياسى ديرەكتورلار كەڭەسىنىڭ ءتوراعاسى انري پۋپار-لافارج مەملەكەت باسشىسىنا كومپانيا جاقىن ارادا ەلەكتروۆوزدار مەن تەمىرجول كولىگى جابدىقتارىن ءوندىرۋ، قىزمەت كورسەتۋ جونىندەگى جوبالارعا 50 ميلليون ەۋرو ينۆەستيسيا قۇياتىنىن ايتتى. ەنەرگەتيكالىق جابدىقتار مەن تەمىرجول كولىگى وندىرىسىندە الەمدىك كوشباسشىلاردىڭ ءبىرى سانالاتىن Alstom كومپانياسىنىڭ سەرۆيستىك ورتالىقتارى استانا، الماتى قالالارىندا، جامبىل جانە تۇركىستان وبلىستارىندا اشىلادى. بۇل جوبالاردى ىسكە اسىرۋعا مىڭنان استام قازاقستاندىق مامان جۇمىلدىرىلادى.
مەملەكەت باسشىسى Airbus، Saint-Gobain، Boehringer Ingelheim France، Soufflet Group، Total Energies، BPI France، Vicat، Syctom، Pellenc، Total Eren، PCM، Safran، Thales، Groupe EDF، Assystem، Evolution International، MHB SAS، Exa International، Rungis Semmaris، MBDA، SOPREMA جانە باسقا دا فرانسيانىڭ ءىرى كومپانيالارىنىڭ باسشىلارىمەن كەزدەستى. بۇل شارا پرەزيدەنتتىڭ پاريجگە جاساعان ساپارى اياسىنداعى ماڭىزدى وقيعانىڭ ءبىرى بولدى.
پرەزيدەنت ءوز سوزىندە ينۆەستيسيالىق ىنتىماقتاستىقتىڭ كەلەشەگى مول باعىتتارىن ۇسىندى. اتاپ ايتقاندا، اگروونەركاسىپ كەشەنى، ەنەرگەتيكا، ەكونوميكانىڭ ناقتى سەكتورى، كولىك جانە لوگيستيكا، سيفرلاندىرۋ سالالارىنداعى جوبالار تۋرالى ءسوز بولدى»، دەدى پرەزيدەنتتىڭ باسپا ءسوز حاتشىسى.
وسىلايشا، پرەزيدەنتتىڭ پاريجدەگى ءاربىر كەزدەسۋىندە ناقتى جوبالاردى ىسكە اسىرۋعا، ميلليونداعان دوللارلىق ينۆەستيسيا مەن وزىق تەحنولوگيالاردى تارتۋعا جانە جاڭا جۇمىس ورىندارىن اشۋعا مۇمكىندىك بەرەتىن كەلىسىم-شارتتار جاسالعان.
ايتا كەتەيىك، مەملەكەت باسشىسىنىڭ فرانسياعا ساپارى اياسىندا ەكونوميكامىزعا زور پايدا اكەلەتىن وتىزعا جۋىق كەلىسىمگە قول قويىلعان.