الماتىدا «شىعىس كەرۋەنى» اتتى كورمە-جارمەڭكەسى وتەدى

كورمە-جارمەڭكە اياسىندا قىش قۇيۋدان شەبەرلىك ساعاتتارى وتكىزىلەدى

قازاقستان رەسپۋبليكاسىنىڭ مەملەكەتتىك ورتالىق مۋزەيى «باحىت» ساندىك-قولدانبالى ونەر ورتالىعى قوعامدىق قورىمەن بىرلەسىپ 2022 جىل 2-4 جەلتوقسان كۇندەرى  ەجەلگى مادەني ءداستۇردى جالعاستىرا وتىرىپ، ورتا ازيا قولونەر شەبەرلەرىنىڭ «شىعىس كەرۋەنى» اتتى كەزەكتى كورمە-جارمەڭكەسىن وتكىزەدى، دەپ حابارلايدى Almaty-akshamy.kz.

بارىمىزگە ايگىلى شىعىس كەرۋەنى حالىقارالىق ەكونوميكالىق جانە مادەني قارىم-قاتىناستاردى دامىتۋ جولىندا ۇلكەن ءرول اتقاردى. كوڭىلدى، ءتۇرلى-تۇستى شىعىس بازارىنا ءار ەلدەن ساۋداگەرلەر مەن ساتىپ الۋشىلار اسىعا كەلىپ، قىتايدىڭ جىبەگى مەن فارفورىن، ءۇندىستاننىڭ ءتاتتى دامدەرىن، حورەزمنىڭ قىشىن، ءتۇرلى بەينەلەۋ تۋىندىلارىن ءتيىمدى باعادا ساتۋ جانە ساتىپ الۋ ساۋداسىن جۇرگىزىپ وتىرعان. وسى ەجەلگى مادەني ءداستۇر بۇگىن دە ءساتتى جالعاسۋدا.

قازاقستاننىڭ ءار ايماعىنان جانە قىرعىزستان، تۇركمەنستان، وزبەكستان ەلدەرىنەن كەلگەن مايتالمان شەبەرلەر ءوز تاۋارلارىن: قولدان توقىلعان جىبەك ورامالدارىن، ەكولوگيالىق تازا كيىزدەن، اعاشتان ويۋلاپ جاساعان، جىبەك جىپتەرمەن توقىلعان كەستەلەرىن، قىشتان جاسالعان، ادەمى زەرگەرلىك بۇيىمدارىن، كيىم-كەشەك، سازدى اسپاپتارىن، شىعىس مينياتيۋرالارىن، كىلەمدەر مەن ساندىقتارىن ۇسىنادى.  

كورمە-جارمەڭكە بىرنەشە ماقساتتى كوزدەيدى:
• شەبەرلەر اراسىندا ءوزارا تاجىريبە الماستىرۋ؛
• ءوز تاۋارلارىن ساتۋ ارقىلى قارجى جاعدايىن زەرتتەۋ؛
• ساتىپ الۋشىلارمەن قارىم-قاتىناستى ۇلعايتۋ؛
• قولونەر شەبەرىن دامىتۋ؛
• مادەني قارىم-قاتىناستى جاقسارتۋ.

كورمە-جارمەڭكە الماتىلىقتار مەن الماتى قالاسى قوناقتارىنىڭ اسىعا كۇتەتىن قىزىقتى ءىس-شارالارىنىڭ ءبىرى دەسە دە بولادى. وسىنداي ءداستۇرلى دە كونە جانە زاماناۋي قولونەر بۇيىمدارىنىڭ كورمە-جارمەڭكەسى الماتىلىقتار مەن قوناقتاردىڭ نازارىن وزىنە تارتادى. 

كورمە-جارمەڭكە اياسىندا  قىش قۇيۋدان شەبەرلىك ساعاتتارى وتكىزىلەدى. 

سونىمەن قاتار كورمە-جارمەڭكە اياسىندا جەلتوقساننىڭ 3 كۇنى بىرنەشە كونكۋرستاردىڭ لاۋرەاتى، ەۆرازيا ديزاينەرلەر وداعىنىنىڭ وردەنىمەن ماراپاتتالعان، فۋرنيتۋرالاردان ۇلتتىق اشەكەيلەردى جاساۋمەن اينالىساتىن قازاقستاندىق قولونەر شەبەرى قاسىمبەكوۆا بەيبىتكۇلدىڭ «كوركەم زەرە» دەپ اتالاتىن كوللەكسياسىنان دەفيلە كورسەتىلەدى.