پرەزيدەنت جۇمانعارينگە قاراجاتتىڭ ءتيىمدى جۇمسالۋىن تاپسىردى

مەملەكەت باسشىسىنا  ۆيسە-پرەمەر ءوزى جەتەكشىلىك ەتەتىن ساۋدا، ينتەگراسيا، اۋىل شارۋاشىلىعى سالالارىنداعى قازىرگى اتقارىلىپ جاتقان جۇمىستار تۋرالى باياندادى. كۇن تارتىبىندەگى وزەكتى ماسەلەلەردىڭ ءبىرى – جوعارى ەۋرازيالىق ەكونوميكالىق كەڭەستىڭ الداعى وتىرىسىنا دايىندىق بارىسى.

2024 جىلى بەس ەلدىڭ ينتەگراسيالىق بىرىگۋىنە 10 جىل تولادى. ەاەو قۇرىلعان ۋاقىت ىشىندە قازاقستاننىڭ سەرىكتەستەرمەن اراداعى ءوزارا ساۋدا اينالىمى 74 پايىزعا ءوستى (2015 جىلى – 16،3 ميلليارد دوللار، 2022 جىلى – 28،3 ميلليارد دوللار). بۇل رەتتە ەكسپورت 90 پايىزعا ارتتى (2015 جىلى – 5،1 ميلليارد دوللار، 2022 جىلى – 9،7 ميلليارد دوللار).

سونىمەن قاتار مەملەكەت باسشىسىنا اگروونەركاسىپ كەشەنىندەگى قايتا وڭدەۋ كولەمىن 30 پايىزدان 70 پايىزعا دەيىن ۇلعايتۋ تۋرالى تاپسىرماسىنىڭ ورىندالۋ بارىسى تۋرالى باياندالدى.

قازىرگى تاڭدا اۋىل شارۋاشىلىعى مينيسترلىگى اگروونەركاسىپ كەشەنى سالاسىندا 2024-2026 جىلدارى جۇزەگە اسىرىلاتىن 500 ءىرى الەۋەتتى جوبا دايىنداعان. ونىڭ جالپى قۇنى – 1،6 تريلليون تەڭگە. العاش رەت ەكىنشى دەڭگەيدەگى وتاندىق بانك بۇل جوبالاردى ىسكە اسىرۋ ءۇشىن 500 ميلليارد تەڭگەگە جۋىق ءوز قارجىسىن سالۋعا دايىن ەكەنىن جەتكىزدى. جاقىن ارادا الەۋەتتى جوبالاردىڭ ءتىزىمى جاڭارتىلادى.

قاسىم-جومارت توقايەۆ پرەمەر-مينيستردىڭ ورىنباسارىنا اۋىل شارۋاشىلىعى سالاسىنداعى جوبالارعا بولىنگەن قاراجاتتىڭ ءتيىمدى جۇمسالۋىنا باقىلاۋدى كۇشەيتۋ جانە حالىقارالىق دەڭگەيدە جوسپارلانعان ءىس-شارالاردىڭ ساپالى دايىندالۋىن قامتاماسىز ەتۋ جونىندە تاپسىرما بەردى.