ساعات 09:00 - دەگى جاعداي بويىنشا قالادا جانە تاۋلى جەرلەردە 13-15 سم قار جاۋدى. قار جاۋا باستاعاننان بەرى جولداردىڭ ءجۇرىس بولىگىن كوكتايعاققا قارسى ماتەريالدارمەن وڭدەۋ جۇرگىزىلۋدە. تروتۋارلار، جالپى پايدالانۋ ورىندارى، قوعامدىق كولىك ايالدامالارى، جەر ءۇستى وتكەلدەرى قاردان تازارتىلۋدا، دەپ حابارلايدى almaty-akshamy.kz
تۇنگى كەزەڭدە جول پوليسياسىنىڭ پاترۋلدىك ماشينالارىنىڭ بىرگە ەرىپ جۇرۋىمەن قاردى تىرمالاۋ بويىنشا سىپىرۋ-جيناۋ ماشينالارىنىڭ 17 كولونناسى ۇيىمداستىرىلدى. ماگيسترالدىق كوشەلەردەن 635 م3 قار سىرتقا شىعارىلدى. جالپى قاردان تازارتۋ جۇمىستارىنا 50 جەدەل پاترۋلدىك بريگادا، 325 بىرلىك ارنايى تەحنيكا، ونىڭ ىشىندە 167 قۇم تاراتقىش، 1154 جول جۇمىسشىسى جۇمىلدىرىلدى. قار تازالاۋ جۇمىستارىنىڭ ءوندىرىسىن باقىلاۋ بويىنشا تاۋلىك بويى كەزەكشىلىك ۇيىمداستىرىلدى.
«قازگيدرومەت» رمك بولجامى بويىنشا قار 15 ساعاتقا دەيىن بىرتىندەپ جاۋادى دەپ كۇتىلۋدە. كۇندىز اۋا تەمپەراتۋراسى مينۋس 10 - 12، كەشكە -16 گرادۋسقا دەيىن تومەندەيدى. تۇندە مينۋس 23- 25 گرادۋس اياز. 13 جەلتوقساننان 14 جەلتوقسانعا قاراعان ءتۇنى مينۋس 25-27 اياز بولادى دەپ كۇتىلۋدە. سوندىقتان، كوممۋنالدىق قىزمەتتەردىڭ كوكتايعاققا قارسى جۇمىستاردى جەدەل جانە ساپالى جۇرگىزۋىن قامتاماسىز ەتۋ ماقساتىندا تاعى دا اۆتوكولىك جۇرگىزۋشىلەردىڭ جولدى قاردان تازارتۋعا تۇسىنىستىكپەن قاراۋدى، مۇمكىندىگىنشە قالا بويىنشا قوزعالىستى شەكتەۋدى جانە جەكە اۆتوكولىكتى جول جيەكتەرىنە قويماۋدى سۇرايمىز.
جەكە كولىكپەن ءجۇرۋدىڭ شۇعىل قاجەتتىلىگى كەزىندە جۇرگىزۋشىلەردى جىلدامدىقتى تومەندەتۋگە، كۇرت تەجەۋگە جۇگىنبەۋگە، قاشىقتىقتى، بۇيىرلىك ارالىقتى جانە مانيەۆر جاساۋ ەرەجەلەرىن ساقتاۋعا شاقىرامىز. جاياۋ جۇرگىنشىلەر تروتۋارلاردا جۇرگەندە اباي بولۋ، بەلگىلەنگەن جەرلەردە كوشەلەردى كەسىپ ءوتۋ كەرەك، قارتتار مەن بالالارعا كومەك كورسەتكەن ءجون.
قاردى ساپالى تازالاۋ بويىنشا تۇرعىندار الماتى قالاسى اكىمدىگىنىڭ «Open Almaty» قوعامدىق قابىلداۋىنا، 1308 بايلانىس ورتالىعىنا جۇگىنە الادى.