ادىلەت ءمينيسترى ازامات ەسقارايەۆقا زاڭنامانى جانە نورماتيۆتىك-قۇقىقتىق بازانى ودان ءارى جەتىلدىرۋ جونىندە ءبىرقاتار مىندەت جۇكتەلدى.
مەملەكەت باسشىسى جاڭادان تاعايىندالعان مينيسترلەردى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
پرەزيدەنت يندۋستريا جانە ينفراقۇرىلىمدىق دامۋ ءمينيسترى مارات قارابايەۆتى، ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆانى، مادەنيەت جانە سپورت ءمينيسترى اسحات ورالوۆتى، وقۋ-اعارتۋ ءمينيسترى عاني بەيسەمبايەۆتى جانە ادىلەت ءمينيسترى ازامات ەسقارايەۆتى قابىلدادى.
كەزدەسۋ بارىسىندا قاسىم-جومارت توقايەۆ مينيسترلىكتەردىڭ جاۋاپكەرشىلىگىندەگى مەملەكەتتىك جانە سالالىق باعدارلامالاردى، ۇلتتىق جوبالاردى ءتيىمدى جۇزەگە اسىرۋدىڭ ماڭىزدىلىعىنا نازار اۋداردى.
مەملەكەت باسشىسى يندۋستريا جانە ينفراقۇرىلىمدىق دامۋ ءمينيسترى مارات قارابايەۆقا گەولوگيا جانە جەر قويناۋىن پايدالانۋ سالاسىن رەتتەۋ، كولىك-لوگيستيكا الەۋەتى مەن وڭدەۋ ونەركاسىبىن دامىتۋ، سونداي-اق تۇرعىن ءۇي قۇرىلىسىنىڭ كولەمىن ارتتىرۋ جۇمىستارىن تاپسىردى.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆاعا سۋ ماسەلەسىنىڭ ساياساتى مەن تابيعي رەسۋرستاردى رەتتەۋ، كوگالداندىرۋ جانە ازاماتتاردى ەكولوگيالىق تۇرعىدا تاربيەلەۋ مىندەتتەرى جۇكتەلدى.
مادەنيەت جانە سپورت ءمينيسترى اسحات ورالوۆقا ءتۋريزمدى، بۇقارالىق سپورتتى جانە مادەنيەت سالاسىن دامىتۋ جونىندە ءبىرقاتار تاپسىرما بەرىلدى.
پرەزيدەنت وقۋ-اعارتۋ ءمينيسترى عاني بەيسەمبايەۆقا "جايلى مەكتەپ" ۇلتتىق جوباسىنىڭ ۋاقتىلى جۇزەگە اسىرىلۋىن قامتاماسىز ەتۋ، سونداي-اق مەكتەپتەگى جانە مەكتەپكە دەيىنگى ءبىلىم بەرۋ ساپاسىن ارتتىرۋ جونىندە تاپسىرما بەردى.
ادىلەت ءمينيسترى ازامات ەسقارايەۆقا زاڭنامانى جانە نورماتيۆتىك-قۇقىقتىق بازانى ودان ءارى جەتىلدىرۋ جونىندە ءبىرقاتار مىندەت جۇكتەلدى.
كەزدەسۋ سوڭىندا قاسىم-جومارت توقايەۆ ازاماتتارمەن تىعىز جۇمىس ىستەپ، ولاردىڭ ماسەلەلەرىن ۋاقتىلى شەشۋ قاجەت ەكەنىن اتاپ ءوتتى.