مەملەكەت باسشىسى قاسىم-جومارت توقايەۆ «ادام قۇقىقتارى مەن زاڭ ۇستەمدىگى سالاسىنداعى ءىس-قيمىل جوسپارى تۋرالى» جارلىققا قول قويدى، دەپ حابارلايدى اقوردا.
جوسپاردا گەندەرلىك تەڭدىكتى كۇشەيتۋگە، تۇرمىستىق زورلىق-زومبىلىققا قارسى كۇرەسكە، قىلمىستىق سوت تورەلىگى سالاسىندا ازاماتتاردى قورعاۋعا، ازاپتاۋ مەن قاتىگەزدىكتىڭ الدىن الۋعا باعىتتالعان ءبىرقاتار شارا قامتىلعان. بىرلەسۋ بوستاندىعى قۇقىعى مەن ەڭبەك قۇقىعىن، سونداي-اق مۇمكىندىگى شەكتەۋلى ازاماتتاردىڭ قۇقىقتارىن قامتاماسىز ەتۋ جولدارى قاراستىرىلعان، - دەپ جازدى توقايەۆ.
قۇجات ادام قۇقىقتارىن قورعاۋدىڭ ۇلتتىق جۇيەسىن نىعايتادى. جوسپاردى جۇزەگە اسىرۋ شەڭبەرىندە ءتيىستى زاڭدار قابىلدانادى.
ۇكىمەت جارتىجىلدىقتا 15 شىلدەگە جانە 5 قاڭتارعا دەيىن قازاقستان رەسپۋبليكاسى پرەزيدەنتىنىڭ اكىمشىلىگىنە ءىس-قيمىل جوسپارىنىڭ ورىندالۋ بارىسى تۋرالى اقپارات ۇسىنۋعا ءتيىس.
وسى جارلىق قول قويىلعان كۇنىنەن باستاپ قولدانىسقا ەنگىزىلەدى.