توقايەۆ ازاماتتاردىڭ قۇقىقتارىن ءتيىمدى قورعاۋدى قامتاماسىز ەتۋگە باعىتتالعان ءبىرقاتار تاپسىرما بەردى.
پرەزيدەنت ادام قۇقىقتارى جونىندەگى ۋاكىل ەلۆيرا ءازىموۆانى قابىلدادى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
قاسىم-جومارت توقايەۆقا ادام قۇقىقتارى جونىندەگى ۋاكىلدىڭ 2021 جىلى اتقارعان جۇمىسىنىڭ قورىتىندىلارى، سونىڭ ىشىندە ازاماتتاردىڭ قۇقىقتارىن قايتا قالپىنا كەلتىرۋگە كومەكتەسۋ ءۇشىن قابىلدانىپ جاتقان شارالار تۋرالى مالىمەت بەرىلدى.
ەلۆيرا ءازىموۆا مەملەكەت باسشىسىنا سوتقا دەيىنگى تەرگەۋ ساتىسىندا ونىڭ ىشىندە قاڭتار وقيعاسى اياسىندا ادام قۇقىقتارىن قورعاۋ ماسەلەلەرى جونىندە باياندادى. سونىمەن قاتار پرەزيدەنتكە قۇقىق قورعاۋ ورگاندارىنىڭ قىزمەتى تۋرالى زاڭنامانى جەتىلدىرۋ، توتەنشە جاعداي رەجيمى كەزىندە ادام قۇقىقتارىن قورعاۋ جانە القابيلەر سوتىنىڭ مانداتىن كەڭەيتۋ جونىندە ۇسىنىس بەرىلدى.
ادام قۇقىقتارى جونىندەگى ۋاكىلگە كونستيتۋسيالىق سوتقا جۇگىنۋ قۇقىعىن بەرۋ تۋرالى پرەزيدەنت باستاماسى اياسىندا ومبۋدسمەن مەملەكەت باسشىسىنا ەۋروپا كەڭەسى ۆەنەسيا كوميسسياسىنىڭ ۇسىنىستارى جونىندە جەتكىزدى. اتالعان باستاما قاسىم-جومارت توقايەۆتىڭ جۋىرداعى جولداۋىندا ايتىلدى.
ەلۆيرا ءازىموۆا پرەزيدەنتكە ادام قۇقىقتارى سالاسىنداعى ەكىنشى شارالار توپتاماسى بويىنشا ازىرلەنىپ جاتقان ۇسىنىستاردى تانىستىردى.
كەزدەسۋ قورىتىندىسى بويىنشا قاسىم-جومارت توقايەۆ ازاماتتاردىڭ قۇقىقتارىن ءتيىمدى قورعاۋدى قامتاماسىز ەتۋگە باعىتتالعان ءبىرقاتار تاپسىرما بەردى. مەملەكەت باسشىسى ۋاكىلدىڭ باس پروكۋراتۋرامەن تىعىز بايلانىستا بولىپ، حالىققا تەرگەۋ ناتيجەلەرى تۋرالى كەڭىنەن اقپارات بەرۋ قاجەت ەكەنىن اتاپ ءوتتى.