جەل سوعادى، كوكتايعاق بولادى.
قازاقستاندىق سينوپتيكتەر 25 ناۋرىزدا اۋا رايىنىڭ بۇزىلۋىنا بايلانىستى بىرنەشە وڭىردە ەسكەرتۋ جاريالادى، دەپ حابارلايدى Almaty-akshamy.kz.
نۇر-سۇلتان قالاسىندا وڭتۇستىك-باتىستان جەل سوعادى، تاڭەرتەڭ جانە كۇندىز ەكپىنى 15-20 م/س جەتەدى.
قىزىلوردا وبلىسىنىڭ سولتۇستىگىندە تۇمان كۇتىلەدى. جەل سولتۇستىك-شىعىستان سوعادى، كۇندىز وبلىستىڭ ورتالىعىندا كۇشى 15-20 م/س جەتەدى.
قوستاناي وبلىسىنىڭ شىعىسىندا، وڭتۇستىگىندە تۇمان، كوكتايعاق بولجانادى. وبلىستىڭ شىعىسىندا جاياۋ بۇرقاسىن جۇرەدى. وڭتۇستىك-باتىستان، باتىستان جەل سوعىپ، كۇندىز شىعىستا ونىڭ ەكپىنى 15-20 م/س ارتادى.
باتىس قازاقستان وبلىسىنىڭ سولتۇستىگىندە تۇمان كۇتىلەدى.
شىعىس قازاقستان وبلىسىنىڭ سولتۇستىك-شىعىسىندا جاياۋ بۇرقاسىن بولادى. جەل باتىستان، وڭتۇستىك-باتىستان سوعادى، تۇندە وبلىستىڭ باتىسىندا، سولتۇستىك-شىعىسىندا، وڭتۇستىگىندە ەكپىنى 23 م/س كۇشەيەدى.
كۇندىز سولتۇستىك قازاقستان وبلىسىنىڭ سولتۇستىگىندە جاياۋ بۇرقاسىن، كوكتايعاق كۇتىلەدى. وڭتۇستىك-باتىستان جەل سوعادى، تۇندە وبلىستىڭ سولتۇستىگىندە، وڭتۇستىگىندە ەكپىنى 15-20 م/س، كۇندىز باسىم بولىگىندە كۇشى 25 م/س ارتادى.
اقتوبە وبلىسىنىڭ سولتۇستىگىندە، ورتالىعىندا تۇمان بولجانادى.
ماڭعىستاۋ وبلىسىندا جاۋىن-شاشىن بولادى. كۇندىز ءوڭىردىڭ باتىسىندا، وڭتۇستىگىندە كەي ۋاقىتتاردا قاتتى جاۋىن-شاشىن (جاڭبىر، قار) كۇتىلەدى. وبلىستىڭ باتىسىندا تۇمان بولجانادى. وڭتۇستىك-شىعىستان سوعاتىن جەل سولتۇستىك-باتىسقا اۋىسادى، وبلىستىڭ باتىسىندا، وڭتۇستىك-شىعىسىندا ەكپىنى 15-20 م/س ارتادى.
تۇندە جانە تاڭەرتەڭ قاراعاندى وبلىسىنىڭ ورتالىعىندا تۇمان كۇتىلەدى. وڭتۇستىك-باتىستان جەل سوعادى، كۇندىز ءوڭىردىڭ سولتۇستىگىندە كۇشى 15-20 م/س جەتەدى.
تۇندە پاۆلودار وبلىسىنىڭ شىعىسىندا، كۇندىز سولتۇستىگىندە جاياۋ بۇرقاسىن، كوكتايعاق بولادى. وڭتۇستىك-باتىستان جەل سوعادى، كۇشى تۇندە شىعىستا، كۇندىز باتىس پەن سولتۇستىكتە 15-20 م/س ارتادى.
اقمولا وبلىسىنىڭ سولتۇستىگىندە، باتىسىندا جاياۋ بۇرقاسىن، كوكتايعاق كۇتىلەدى. وڭتۇستىك-باتىستان جەل سوعادى، وبلىستىڭ سولتۇستىگىندە، شىعىسىندا ەكپىنى 15-20 م/س كۇشەيەدى.
تۇندە تۇركىستان وبلىسىنىڭ باتىسىندا، وڭتۇستىگىندە، تاۋلى جانە تاۋ بوكتەرلى اۋداندارىندا تۇمان كۇتىلەدى. وڭتۇستىك-شىعىستان جەل سوعادى، كۇندىز تاۋ اسۋلارىندا كۇشى 15-20 م/س قۇرايدى.
25-27 ناۋرىزدا جامبىل وبلىسىنىڭ وڭتۇستىگىندە، سولتۇستىك-شىعىسىندا جانە تاۋلى اۋداندارىندا قاتتى جاۋىن-شاشىن (جاڭبىر، قار) كۇتىلەدى. ءوڭىردىڭ وڭتۇستىگىندە، سولتۇستىك-شىعىسىندا جانە تاۋلى اۋداندارىندا تۇمان، كوكتايعاق بولجانادى. 26-27 ناۋرىزدا جەلدىڭ كۇشى كەي ۋاقىتتا 23-28 م/س جەتەدى.