قازاقستاندا پەريزات قايراتتىڭ اتىشۋلى ىسىنە بايلانىستى قايىرىمدىلىق قورلارىنىڭ جۇمىسىنا قويىلاتىن تالاپتار كۇشەيتىلە مە؟ بۇل سۇراققا پرەمەر-مينيستر ولجاس بەكتەنوۆ جاۋاپ بەردى، - دەپ حابارلايدى aqshamnews.kz.
"ءقازىر پەريزات قايراتقا قاتىستى داۋلى، رەزونانستى ءىس قارالىپ جاتىر. وسى جاعدايدان كەيىن قايىرىمدىلىق قورلارى مەن حالىقتان قاراجات جيناۋمەن اينالىساتىن ۇيىمدارعا قويىلاتىن تالاپتارعا وزگەرىستەر ەنگىزىلە مە؟" – دەپ سۇرادى ۇكىمەتتەگى بريفينگتە تىلشىلەر.
ولجاس بەكتەنوۆ بۇل جاعدايدان حاباردار ەكەنىن ايتتى.
"ءيا، ارينە، بۇل جاعدايمەن تانىسپىن. وكىنىشكە قاراي، ماقساتسىز جۇمسالاتىن تەك بيۋدجەت قارجىسى ەمەس، ازاماتتاردان جينالعان قايىرىمدىلىق قاراجاتى دا بار. بۇل – سونىڭ ايقىن مىسالى. جانە جالعىز مىسال ەمەس، باسقا دا وقيعالار بولعان. ءبىراق بۇل – ەڭ شۋلى ءىس شىعار"، – دەدى پرەمەر-مينيستر.
بەكتەنوۆتىڭ پىكىرىنشە، قازاقستانعا قاراجات جيناۋعا قاتىستى زاڭنامالىق وزگەرىستەر قاجەت. بۇل قاراجاتتىڭ جۇمسالۋىن ەسەپتى، باقىلاۋلى ءارى اشىق ەتۋگە مۇمكىندىك بەرەدى.
"قۇقىق قورعاۋ ورگاندارى بۇل ۇرلىقتىڭ ناقتى قانداي جولمەن جاسالعانىن انىقتاپ بەرەدى دەپ ويلايمىن. وسىدان كەيىن وسىنداي قۇقىقبۇزۋشىلىقتاردىڭ الدىن الۋ ماقساتىندا زاڭنامالىق تۇزەتۋلەر ەنگىزۋگە بولادى"، – دەپ قوستى ۇكىمەت باسشىسى.