نيۋ-يورك قالاسىنداعى بۇۇ شتاب-پاتەرىندە يادرولىق قارۋعا تىيىم سالۋ تۋرالى شارتقا قاتىسۋشى مەملەكەتتەردىڭ كونفەرەنسياسى اياسىندا قاراعاندى وبلىسىنىڭ دەلەگاسياسى الەمگە ايگىلى سۋرەتشى كارىپبەك كۇيىكوۆتىڭ «پوليگون جاڭعىرىعى» اتتى كورمەسىن ۇسىندى، دەپ حابارلايدى aqshamnews.kz
كورمە اياسىندا كارىپبەك كۇيىكوۆتىڭ سەمەي يادرولىق پوليگونى زارداپتارىنىڭ قاسىرەتىن بەينەلەيتىن تۋىندىلارى مەن قاراعاندى وبلىستىق تاريحي-ولكەتانۋ مۋزەيىنىڭ قورىنان الىنعان فوتوماتەريالدار كورسەتىلدى. بۇل شارا ارقىلى قازاقستاندىق دەلەگاسيا ەلدىڭ تاريحي شىندىعى مەن مادەني بولمىسىن الەمدىك قاۋىمداستىققا پاش ەتتى.
— ءبىزدىڭ وتانىمىزدىڭ ونەرىن بۇۇ سياقتى بەدەلدى حالىقارالىق الاڭدا تانىستىرۋ — ۇلكەن مارتەبە. شىعارماشىلىق پەن ونەر ارقىلى بەيبىتشىلىك پەن تۇراقتىلىقتىڭ ماڭىزدىلىعى تۋرالى، جاھاندىق قاۋىپسىزدىك ءۇشىن ءاربىر ادامنىڭ ءرولى جايلى ماڭىزدى حابار جەتكىزە الامىز دەپ سەنەمىز، — دەدى قاراعاندى وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ.
يادرولىق قارۋدى تاراتپاۋ جونىندەگى كونفەرەنسيا — ۇكىمەتتەر، عالىمدار، بەلسەندىلەر مەن ازاماتتىق قوعام وكىلدەرىن بىرىكتىرەتىن جاھاندىق دەڭگەيدەگى ماڭىزدى وقيعا. وسى فورۋم اياسىندا ۇيىمداستىرىلعان كۇيىكوۆتىڭ كورمەسى قاتىسۋشىلاردىڭ نازارىن تەحنيكالىق ماسەلەلەرمەن قاتار، يادرولىق قارۋدان زارداپ شەككەن ادامداردىڭ تاعدىرىنا، بەيبىتشىلىك پەن ادامزات قاۋىپسىزدىگىنە اۋدارتتى.
كورمە كونفەرەنسيا كۇنى بويى اشىق بولدى. كۇن سايىن 100-دەن استام كەلۋشى كارىپبەكتىڭ ەڭبەكتەرىمەن تانىسىپ، ونىڭ شىعارماشىلىعىنا جانە قازاقستاننىڭ يادرولىق قارۋعا قارسى كۇرەستەگى ۇستانىمىنا جوعارى باعا بەردى.
كارىپبەك كۇيىكوۆ — يادرولىق قارۋسىز الەم يدەياسىن قولداۋشى سيمۆول. ونىڭ شىعارماشىلىعى – بۇل تەك ونەر ەمەس، بۇل كۇرەس، ءۇمىت پەن ومىرگە قۇشتارلىقتىڭ كورىنىسى. قازاقستاندىق دەلەگاسيا وسى كورمە ارقىلى ەلىمىزدىڭ بەيبىتشىلىك پەن تۇراقتىلىقتى قولدايتىنىن تاعى ءبىر مارتە دالەلدەدى.
باستى ماقساتىمىز — بولاشاق ۇرپاققا ءقاۋىپسىز ءارى گۇلدەنگەن الەم قالدىرۋ!