قىرعىز رەسپۋبليكاسىنىڭ ۇلتتىق قاۋىپسىزدىك مەملەكەتتىك كوميتەتىنىڭ ءتوراعاسى كامچىبەك تاشييەۆ جاڭعاقتى «قىرعىز جاڭعاعى» دەپ اتاۋدى ۇسىندى. بۇل تۋرالى وتكۋربەك راحمانوۆ Facebook پاراقشاسىندا جاريالاعان ۆيدەودا ايتىلعان، دەپ حابارلايدى aqshamnews.kz
بەينەجازبادان كورىنگەندەي، بۇل سوزدەر جالال-اباد وبلىسىندا كوشەت وتىرعىزۋ كەزىندە ايتىلعان.
«مىڭداعان جىلدان بەرى ءبىزدىڭ وڭىردە جاڭعاق ءوسىپ كەلەدى. الەم بويىنشا ەڭ ۇلكەن جاڭعاق القابى ارسلانبوبتا ورنالاسقان. بۇل تەك قىرعىزستان بويىنشا ەمەس، بۇكىل ورتالىق ازيادا، ءتىپتى باسقا قۇرلىقتاردا دا مۇنداي القاپ جوق. جەر بەتىندە مۇنداي ۇلكەن جاڭعاق ورمانى جوق. ءبىز وسىنداي ەرەكشە جەردە ءومىر ءسۇرىپ جاتىرمىز. الەمگە جاڭعاق ءدال وسى قىرعىزستاننان تارالعان. كەيىن ونى گرەك جاڭعاعى، تۇرىك جاڭعاعى، يسپان، ۆەنگر جاڭعاعى دەپ اتاپ كەتكەن. ءبىراق شىن مانىندە ول قىرعىزستاننان شىققان. سوندىقتان ءبىز ونى گرەك جاڭعاعى ەمەس، قىرعىز جاڭعاعى دەپ اتاۋىمىز كەرەك»، – دەدى تاشييەۆ.
بۇعان دەيىن حابارلانعانداي، كامچىبەك تاشييەۆتىڭ باستاماسىمەن جالال-اباد وبلىسىندا 100 گەكتار بوس جەرگە 40 مىڭ كوشەت وتىرعىزۋ باستالعان. قىرعىزستاننىڭ توتەنشە جاعدايلار مينيسترلىگى بۇل اۋماققا جاڭعاقتان بولەك، فيستاشكا، بادام، الما، قاراعاي، ورىك، سونداي-اق قىلقان جاپىراقتى جانە جالپاق جاپىراقتى اعاش تۇرلەرى وتىرعىزىلاتىنىن ناقتىلاعان.
الدىڭعى جىلدارى قىرعىزستاننىڭ قورشاعان ورتانى قورعاۋ جانە ورمان شارۋاشىلىعى اگەنتتىگى قىرعىز جاڭعاعىنىڭ برەندىن قالىپتاستىرۋ جۇمىستارىن جۇرگىزىپ جاتقانىن حابارلاعان. وندا ەشبىر ەلدە قىرعىزستانداعىداي جابايى جاڭعاقتار وسپەيتىنى ايتىلعان. اگەنتتىك مالىمەتىنشە، جاڭعاق ورماندارىنىڭ جالپى اۋماعى 45 مىڭ گەكتاردى قۇرايدى. ال open.kg سايتىنىڭ دەرەگىنشە، ارسلانبوب اڭعارىندا عانا جاڭعاق ورماندارى 600 مىڭ گەكتاردان استام اۋماقتى الىپ جاتىر.