الماتىدا، استانادا نەمەسە باسقا ءىرى قالادا پاتەردى جالعا الۋ وڭاي ەمەس. اقشانى جالعان "ريەلتورعا" بەرىپ، ءۇيسىز قالماۋدىڭ، الدانىپ قالماۋدىڭ جولى بار ما؟ بار! جالعا پاتەر العاندا نەنى ەستە ۇستاعان ءجون؟ بۇل ماقالادا ەڭ قاجەت لايفحاكتاردى توپتاستىردىق، - دەپ حابارلايدى aqshamnews.kz ءتىلشىسى.
اقشانى ەشقاشان الدىن الا اۋدارماڭىز!
ادەتتە پاتەر جالداۋعا كەلگەندە الاياقتار "بۇل ۇيگە قىزىعىپ جۇرگەن ادام كوپ، ماعان ءقازىر بەلگىلى مولشەردە اقشا اۋدارساڭىز، ءۇيدى سىزدەن باسقا ەشكىمگە جالعا بەرمەيمىن" دەپ الدايدى. مەن دە بىرنەشە رەت بۇل قارماققا ىلىنگەنمىن. الايدا پاتەردى جالعا بەرۋشى الدىمەن كىمگە جالعا بەرەيىن دەپ جاتقانىنا كوز جەتكىزەدى. سوندىقتان ولار دا قىزىعۋشىلىعى بار ادامنىڭ باسپانانى كەلىپ كورىپ، كوزبە-كوز كەلىسىمگە كەلگەنىن قالايدى. ءبىر قىزىعى، الاياقتار سەنىمگە كىرۋ ءۇشىن ءتىپتى جەكە كۋالىكتىڭ سۋرەتىن دە جىبەرەدى، ءبىراق بۇل ولارعا سەنۋگە بولادى دەگەن ءسوز ەمەس.
لايفحاك: ريەلتورعا نەمەسە مەنشىك يەسىنە الدىن الا اقشا جىبەرمەڭىز! ەڭ دۇرىسى – پاتەردى ءوز كوزىڭىزبەن كورىپ، كەلىسىمشارت جاساسقاننان كەيىن عانا تولەۋ.
پاتەر يەسى مە، الدە دەلدال ما؟ انىقتاپ الىڭىز!
كوپ جاعدايدا پاتەردى دەلدالدار ءوزىن پاتەر يەسى رەتىندە تانىستىرىپ، ونى جالعا بەرەدى. ءبىراق قانداي دا ءبىر پروبلەما بولسا، دەلدال زاڭ الدىندا جاۋاپ بەرمەيدى. سوسىن پاتەر يەسى كەلىپ، "بۇل - مەنىڭ پاتەرىم، بوساتىڭدار" دەسە، دالادا قالۋىڭىز مۇمكىن.
نە ىستەۋ كەرەك؟ پاتەردىڭ ناقتى يەسىن انىقتاڭىز. ول ءۇشىن تەحپاسپورتتىڭ كوشىرمەسىن سۇراڭىز.
مىندەتتى تۇردە كەلىسىمشارت جاساڭىز
"قازاقپىز عوي، اۋىزشا كەلىسە سالدىق" دەگەننىڭ زاڭ الدىندا كۇشى جوق. ەگەر كەلىسىمشارت بولماسا، ەرتەڭ پاتەر يەسى ءسىزدى كەز كەلگەن ۋاقىتتا قۋىپ شىعۋى مۇمكىن. ال ەگەر پاتەردە بىردەڭە بۇلىنسە نەمەسە كورشىمەن جانجالداسىپ قالساڭىز، بارلىق جاۋاپكەرشىلىك ءسىزدىڭ موينىڭىزعا ارتىلادى.
كەلىسىمشارتتا نە بولۋعا ءتيىس؟
- تاراپتاردىڭ تولىق ءاتى-جونى مەن جسن؛
- تولەم مولشەرى مەن تولەۋ مەرزىمى؛
- كوممۋنالدىق قىزمەتتەردىڭ كىم تولەۋى كەرەگى؛
- پاتەرگە كىمدەر كىرىپ-شىعا الاتىنى؛
- جالعا الۋ مەرزىمى مەن بۇزۋ شارتتارى.
الەۋمەتتىك جەلى
پاتەر يەسىمەن بارلىق حات الماسۋدى ساقتاڭىز. قانشا اقشا بەرگەنىڭىز، قانداي كەلىسىمگە كەلگەنىڭىزدىڭ - ءبارى كەيىن ماڭىزدى بولۋى مۇمكىن.
مىسالى: "20 000 تەڭگە الدىن الا تولەمدى پاتەردى برونداۋ ءۇشىن جىبەردىم" دەگەن سكرين سىزگە سوتتا دالەل بولادى.
پاتەردىڭ تەحنيكالىق كۇيىن تەكسەرىڭىز
ەسىگى جابىلا ما؟ سۋى اعىپ تۇر ما؟ توق جۇيەسى جۇمىس ىستەي مە؟ كورشىلەرى تىنىش پا؟ بۇل سۇراقتاردى ناقتىلاپ الىڭىز.
نەنى تەكسەرۋ كەرەك؟
- ىستىق/سۋىق سۋ؛
- گاز پليتاسى؛
- جۋىناتىن بولمە (سۋدىڭ اعۋى، ءيىسى)؛
- تەرەزە مەن ەسىكتىڭ تۇتقالارى؛
- Wi-Fi.
باعاعا دۇرىس "باعا" بەرىڭىز
پاتەر باعاسى تىم ارزان بولسا، دەمەك مۇندا ءبىر شيكىلىك بار نەمەسە الاياقتار ءسىزدى سان سوقتىرىپ كەتۋى مۇمكىن. ادەتتە، پاتەر باعاسى ورتاشا نارىقتاعى باعادان 30-40 پايىزعا ارزان بولسا، دەمەك بۇل - الاياقتار.
لايفحاك: Krisha.kz، Olx.kz سياقتى سايتتاردان سول اۋداننىڭ، سول تيپتەگى پاتەرلەردىڭ ورتاشا باعاسىن سالىستىرىپ قاراڭىز.
كوممۋنالدىق تولەمدەردى انىقتا
كوپ جاعدايدا پاتەر يەسى مەن جالعا الۋشى كوممۋنالدىق تولەمگە قاتىستى سۇراقتى الدىن الا تالقىلامايدى. كەيىن ەكەۋىنىڭ اراسىندا تۇسىنىسپەۋشىلىك پايدا بولۋى مۇمكىن.
پاتەردى جالعا بەرۋشى كۇماندى بولسا، بىردەن تەكسەرىپ العانىڭىز ءجون. الاياقتار ءوز سحەماسىن ۇنەمى جاڭارتىپ وتىرادى. سوندىقتان ساق بولىڭىز!