3 ماۋسىمدا ق ر پرەزيدەنتى جانىنداعى ادام قۇقىقتارى جونىندەگى كوميسسيا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) استاناداعى باعدارلامالار ءوفيسىنىڭ، ورتالىق ازياداعى شەكارالاردى باسقارۋعا جاردەمدەسۋ باعدارلاماسىنىڭ (بومكا) جانە الماتى قالاسى اكىمدىگىنىڭ قاتىسۋىمەن مەملەكەتتىك قىزمەتشىلەرگە، ۇەۇ وكىلدەرىنە جانە الماتى قالاسىنىڭ جۇرتشىلىعىنا ارناپ «قازاقستانداعى ادام قۇقىقتارىن قورعاۋدىڭ ۇلتتىق جانە حالىقارالىق تەتىكتەرى» تاقىرىبىندا وقىتۋ سەمينار-ترەنينگىن وتكىزدى.
سەمينار-ترەنينگكە الماتى قالاسىنىڭ جەرگىلىكتى قۇقىق قورعاۋ جانە سوت ورگاندارىنىڭ، حالىقتى الەۋمەتتىك قورعاۋ، ءبىلىم بەرۋ، دەنساۋلىق ساقتاۋ جانە مادەنيەت مەكەمەلەرىنىڭ باسشىلارى مەن قىزمەتكەرلەرى، سونداي-اق ادۆوكاتۋرا ينستيتۋتىنىڭ، ازاماتتىق قوعام جانە جاستار ۇيىمدارىنىڭ وكىلدەرى، سونداي-اق الماتى قالاسىنداعى جوعارى وقۋ ورىندارىنىڭ ستۋدەنتتەرى مەن ماگيسترانتتارى قاتىستى.
سەمينار-ترەنينگ تىڭداۋشىلارىنىڭ الدىندا الماتى قالاسى اكىمدىگىنىڭ قوعامدىق دامۋ باسقارماسىنىڭ باسشىسى ايدار ەسەنبەكوۆ، ق ر پرەزيدەنتى جانىنداعى ادام قۇقىقتارى جونىندەگى كوميسسيا ءتوراعاسىنىڭ ورىنباسارى تاستەمىر ابىشيەۆ، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ استاناداعى باعدارلامالار ءوفيسى باسشىسىنىڭ مىندەتىن اتقارۋشى يۋريي فەنوپەتوۆ مىرزا جانە ورتالىق ازياداعى شەكارالاردى باسقارۋعا جاردەمدەسۋ باعدارلاماسىنىڭ (بومكا) وڭىرلىك مەنەدجەرى ماريس دومينش مىرزا قۇتتىقتاۋ ءسوز سويلەدى.
سەمينار-ترەنينگتە قازاقستان رەسپۋبليكاسىنداعى ادام قۇقىقتارىن قورعاۋدىڭ ۇلتتىق جانە حالىقارالىق جۇيەسى زەردەلەندى. ادام قۇقىقتارى جونىندەگى ۇلتتىق مەكەمەلەردىڭ سوت جانە قۇقىق قورعاۋ ورگاندارىمەن، باسقا دا مەملەكەتتىك ورگاندارمەن، سونداي-اق حالىقارالىق ۇيىمدارمەن جانە ازاماتتىق قوعام ينستيتۋتتارىمەن ءوزارا ءىس-قيمىل تەتىكتەرى قارالدى.
سەميناردا قازاقستان رەسپۋبليكاسى ازاماتتارىنىڭ، سونداي-اق قازاقستان اۋماعىندا تۇراقتى نەمەسە ۋاقىتشا تۇراتىن وزگە دە ادامداردىڭ ازاماتتىق، ەڭبەك، الەۋمەتتىك-ەكونوميكالىق جانە مادەني قۇقىقتارىن قورعاۋدىڭ وزەكتى ماسەلەلەرى قارالدى. تىڭداۋشىلار ازاماتتاردىڭ ءوز قۇقىقتارىن سوتتا جانە سوتتان تىس قورعاۋ، ازاپتاۋلاردان جانە قاتىگەزدىك پەن جازانىڭ باسقا تۇرلەرىنەن، كەمسىتۋشىلىكتەن ەركىن بولۋ، بىلىكتى زاڭ كومەگىن الۋ كونستيتۋسيالىق قۇقىقتارىن ىسكە اسىرۋ تەتىكتەرىمەن تانىستى.
تىڭداۋشىلار سونداي-اق ازاماتتار مەن وزگە دە ادامداردىڭ اقپارات الۋعا، ءبىلىم الۋعا، الەۋمەتتىك قىزمەت كورسەتۋگە، كاسىپكەرلىك قىزمەتتى جۇزەگە اسىرۋعا كونستيتۋسيالىق قۇقىقتارىن ىسكە اسىرۋ تەتىكتەرىمەن، سونداي-اق قوعامداعى ىقتيمال ەڭبەك جانە الەۋمەتتىك جانجالداردىڭ الدىن الۋ جانە شەشۋ تەتىكتەرىمەن تانىستى.
بۇدان باسقا، سەميناردا تۇرمىستىق زورلىق-زومبىلىققا جانە ادام ساۋداسىنا قارسى ءىس-قيمىل سالاسىنداعى ادام قۇقىقتارىن، سونداي-اق ايەلدەر مەن بالالاردىڭ، مۇگەدەكتىگى بار ادامداردىڭ قۇقىقتارىن قورعاۋدىڭ وزەكتى ماسەلەلەرى تالقىلاندى.
كوميسسيا مۇشەلەرى ت.ابىشيەۆ، س.جاركەنوۆا، ز.بايساقوۆا جانە ش.حاسانوۆا تىڭداۋشىلارعا ادامنىڭ جانە ازاماتتىڭ قۇقىقتارى مەن بوستاندىقتارى، سونداي-اق ازاماتتاردىڭ مەملەكەت پەن قوعام الدىنداعى مىندەتتەرى تۋرالى ناقتى مىسالدارمەن ايتىپ بەردى.
ماسەلەن، كوميسسيا ءتوراعاسىنىڭ ورىنباسارى تاستەمىر ابىشيەۆ ءوز سوزىندە جەرگىلىكتى حالىقتىڭ ادام قۇقىقتارى مەن بوستاندىقتارى، ادام قۇقىقتارىن قورعاۋدىڭ سوت جانە سوتتان تىس تەتىكتەرى، قازاقستان رەسپۋبليكاسى ازاماتتارىنىڭ جەكە شاعىمدارى مەن حابارلامالارىن قاراۋداعى بۇۇ-نىڭ شارتتىق ورگاندارى قىزمەتتەرىنىڭ نەگىزگى قاعيداتتارى تۋرالى حاباردار بولۋ دەڭگەيىن ارتتىرۋ، سونداي-اق قوعامنىڭ بارلىق توپتارىنىڭ قۇقىقتىق مادەنيەت دەڭگەيىن ارتتىرۋ ءۇشىن قازاقستاننىڭ وڭىرلەرىندە ادام قۇقىقتارى جونىندەگى وقىتۋ سەمينار-ترەنينگتەرىنىڭ ماڭىزدىلىعىن اتاپ ءوتتى.
بۇدان ءارى كوميسسيا ءتوراعاسىنىڭ ورىنباسارى قازاقستان پرەزيدەنتى قاسىم-جومارت توقايەۆتىڭ زاڭنىڭ ۇستەمدىگىنە جانە قازاقستاندىق قوعامدا قۇقىقتىق مادەنيەتتى ورناتۋعا، قازاقستان رەسپۋبليكاسىنىڭ حالىقارالىق مىندەتتەمەلەرى اياسىندا ازاماتتاردىڭ كونستيتۋسيالىق قۇقىقتارىن ساقتاۋعا ماڭىزدى ءمان بەرەتىنىن ەرەكشە اتاپ ءوتتى.
ەۋروپاداعى قاۋىپسىزدىك جانە ىنتىماقتاستىق ۇيىمىنىڭ استاناداعى باعدارلامالار ءوفيسى باسشىسىنىڭ مىندەتىن اتقارۋشى يۋريي فەنوپەتوۆ مىرزا ءوز سوزىندە قازاقستاننىڭ شالعاي اۋداندارى مەن اۋىلدارىن قامتيتىن ادام قۇقىقتارى جونىندەگى كوميسسيا مەن ەقىۇ-نىڭ بىرلەسكەن وقىتۋ سەمينار-ترەنينگتەرىنىڭ بىرەگەيلىگىن اتاپ ءوتتى.
سەمينار-ترەنينگ بارىسىندا تىڭداۋشىلار بىرىككەن ۇلتتار ۇيىمىنىڭ ادام قۇقىقتارى سالاسىنداعى شارتتىق ورگاندارىنىڭ باقىلاۋ فۋنكسيالارىمەن، بۇۇ قۇرعان باقىلاۋ ورگاندارىنىڭ قۇزىرەتىمەن تانىستى، بۇۇ ءتيىستى كوميتەتتەرىندە ازاماتتاردىڭ جەكە شاعىمدارىن قاراۋ تەتىكتەرىن تالقىلادى.
سەمينار-ترەنينگ بارىسىندا قاتىسۋشىلار ادام قۇقىقتارىن قورعاۋ جانە كوتەرمەلەۋ سالاسىندا تاجىريبە الماستى. كوميسسيا مۇشەلەرى تىڭداۋشىلاردى قىزىقتىرعان سۇراقتارعا جاۋاپ بەردى.