توقايەۆ «بايقوڭىر» عارىش ايلاعىنىڭ قۇرىلعانىنا 70 جىل تولۋىمەن قۇتتىقتادى

مەملەكەت باسشىسى قاسىم-جومارت توقايەۆ «بايقوڭىر» عارىش ايلاعىنىڭ قۇرىلعانىنا 70 جىل تولۋىنا وراي ۆيدەو ۇندەۋ جولدادى، دەپ حابارلايدى aqshamnews.kz اقورداعا سىلتەمە جاساپ.

قۇرمەتتى دوستار!
ءقادىرلى عارىش سالاسىنىڭ قىزمەتكەرلەرى مەن ارداگەرلەرى!

بارشاڭىزدى «بايقوڭىر» عارىش ايلاعىنىڭ قۇرىلعانىنا 70 جىل تولۋىمەن قۇتتىقتايمىن!

1957 جىلى ءدال وسى ارادان جاساندى جەر سەرىگى ۇشىرىلىپ، عارىشتى يگەرۋ ءداۋىرى باستالدى. كوپ ۇزاماي، 1961 جىلى ايلاقتان تۇڭعىش عارىشكەر يۋريي گاگارين كوك جۇزىنە اتتاندى. بۇل تاريحي وقيعا جاھان جۇرتشىلىعىن بىرىكتىرىپ، ادامزاتتىڭ عىلىم مەن وركەنيەت پروگرەسىنە دەگەن سەنىمىن نىعايتتى. سودان بەرى بايقوڭىردان مىڭداعان جەر سەرىگى ۇشىرىلىپ، ونداعان ميسسيا ورىندالدى. مۇندا كورنەكتى عالىمدار، كونسترۋكتورلار مەن ينجەنەرلەر جۇمىس ىستەدى. ۇلى جەتىستىكتەردىڭ باستاۋىندا تۇرعان بارلىق مامانعا شەكسىز ريزاشىلىعىمدى بىلدىرەمىن!

ءبىز الەمدەگى ەڭ ءىرى عارىش ايلاعىنىڭ قازاق جەرىندە ورنالاسقانىن ەرەكشە ماقتان تۇتامىز. حالقىمىزدىڭ قاھارمان ۇلدارى توقتار اۋباكىروۆ، تالعات مۇسابايەۆ جانە ايدىن ايىمبەتوۆ وسى ارادان كوسموسقا اتتاندى.

ەلىمىز حالىقارالىق عارىشتى يگەرۋ ءىسىنىڭ بەلسەندى مۇشەسى سانالادى. «بايقوڭىر» ايلاعى – قازاقستان مەن رەسەيدىڭ دوستىققا، تاتۋ كورشىلىككە جانە ءوزارا تۇسىنىستىككە نەگىزدەلگەن ۇزاقمەرزىمدى ستراتەگيالىق سەرىكتەستىگىنىڭ جارقىن كورىنىسى.

سوڭعى ونجىلدىقتاردا قازاقستان ۇلتتىق ەكونوميكانىڭ دامۋىنا ىقپال ەتەتىن ءبىرقاتار اۋقىمدى عارىش جوبالارىن ىسكە اسىردى. ەلىمىز بايقوڭىردى حالىقارالىق ىنتىماقتاستىقتىڭ، عىلىم مەن ءبىلىمنىڭ جانە ءتۋريزمنىڭ ورتالىعىنا اينالدىرۋعا ۇمتىلادى. عارىش قىزمەتىنىڭ جاڭا نارىقتارىنا شىعۋ، جاس ينجەنەرلەردىڭ، كونسترۋكتورلار مەن عالىمداردىڭ الەۋەتىن ارتتىرۋ جارقىن بولاشاققا جول اشادى.

وسى ورايلى ءساتتى پايدالانىپ، بايقوڭىر قالاسىنىڭ تۇرعىندارىنا ايرىقشا العىس ايتقىم كەلەدى. سىزدەر تاباندى ەڭبەك ەتىپ، عارىشتى زەرتتەۋ ءىسىنىڭ ءىزاشارلارىنان قالعان مول مۇرانى مۇقيات ساقتاپ كەلەسىزدەر. بۇل – زور قۇرمەتكە لايىق. عارىش سالاسى بۇكىل ادامزاتتى ءاردايىم ورتاق ماقساتقا جۇمىلدىرىپ، جاڭاشىلدىق پەن عىلىمي-تەحنيكالىق پروگرەسكە باستايدى. بايقوڭىر الداعى ۋاقىتتا دا ۇلى جاڭالىقتار مەن وزىق يننوۆاسيالاردىڭ قاينار كوزى بولا بەرەدى دەپ سەنەمىن!

بارشاڭىزعا اماندىق جانە تابىس تىلەيمىن!