2026 جىلعى 1 قاڭتاردان باستاپ قازاقستاندا پاسپورت، جۇرگىزۋشى كۋالىگى جانە ءبىرقاتار رەسمي قۇجاتتاردى راسىمدەۋ باعاسى وسەدى. بۇعان ايلىق ەسەپتىك كورسەتكىشتىڭ (اەك/مرپ) 3 932 تەڭگەدەن 4 325 تەڭگەگە دەيىن قىمباتتاۋى سەبەپ بولىپ وتىر. بۇل كورسەتكىش 2026–2028 جىلدارعا ارنالعان رەسپۋبليكالىق بيۋدجەت تۋرالى زاڭدا بەكىتىلگەن، - دەپ حابارلايدى اqshamnews.kz ءتىلشىسى.
قانداي قۇجاتتار قىمباتتايدى؟
جاڭا اەك-كە بايلانىستى مەملەكەتتىك باج مولشەرلەمەلەرى تومەندەگىدەي بولادى:
-
16 جاسقا دەيىنگى بالالارعا ارنالعان پاسپورت (24 بەت) – 4 اەك، ياعني 17 300 تەڭگە
(2025 جىلى – 15 728 تەڭگە) -
كادىمگى پاسپورت (36 بەت) – 8 اەك، ياعني 34 600 تەڭگە
(2025 جىلى – 31 456 تەڭگە) -
48 بەتتىك پاسپورت – 12 اەك، ياعني 51 900 تەڭگە
(2025 جىلى – 47 184 تەڭگە) -
جەكە كۋالىك – 0،2 اەك، ياعني 865 تەڭگە
(2025 جىلى – 786 تەڭگە)
ەگەر جەكە كۋالىك ءبىر جىل ىشىندە ەكى رەتتەن كوپ جوعالسا، ونى قايتا راسىمدەۋ 1 اەك – 4 325 تەڭگە تۇرادى.
جۇرگىزۋشى كۋالىگىن راسىمدەۋ قۇنى – 1،25 اەك، ياعني 5 406 تەڭگە بولادى.
نەكە قيۋ مەن اجىراسۋ قۇنى
2026 جىلدان باستاپ احات بولىمدەرىندەگى كەيبىر قىزمەتتەر دە قىمباتتايدى:
-
نەكە قيۋ تۋرالى كۋالىك – 1 اەك، ياعني 4 325 تەڭگە
-
اجىراسۋ ءۇشىن مەملەكەتتىك باج – 2 اەك، ياعني 8 650 تەڭگە
(2025 جىلى – 7 864 تەڭگە)
وسىلايشا، اجىراسۋ قۇنى نەكە قيۋدان ەكى ەسە قىمبات بولادى.
بالانىڭ تۋۋ تۋرالى العاشقى كۋالىگى بۇرىنعىداي تەگىن بەرىلەدى.
الايدا كۋالىكتى قايتا راسىمدەۋ (مىسالى، جوعالتقان جاعدايدا) ءۇشىن 0،5 مرپ تولەۋ كەرەك – بۇل 2 163 تەڭگە.
كىمدەر مەملەكەتتىك باجدان بوساتىلادى؟
قۇجاتتاردى راسىمدەۋ كەزىندە ءبىرقاتار ازاماتتار ساناتتارى مەملەكەتتىك باج تولەۋدەن بوساتىلادى. ولار:
-
ەلدىڭ باتىرلارى مەن جوعارى مەملەكەتتىك ناگرادالار يەگەرلەرى؛
-
قۇرمەتتى اتاعى بار كوپبالالى انالار؛
-
سوعىس ارداگەرلەرى مەن ۇرىس قيمىلدارىنا قاتىسۋشىلار؛
-
مۇگەدەكتىگى بار ادامدار جانە مۇگەدەك بالانى تاربيەلەپ وتىرعان اتا-انالار؛
-
الەۋمەتتىك مەكەمەلەردە تۇراتىن قارتتار؛
-
جەتىم بالالار جانە تولىق مەملەكەتتىك قامقورلىقتاعى بالالار؛
-
چەرنوبىل اپاتىنان زارداپ شەككەندەر.
2026–2028 جىلدارعا ارنالعان رەسپۋبليكالىق بيۋدجەت تۋرالى زاڭعا 8 جەلتوقساندا پرەزيدەنت قاسىم-جومارت توقايەۆ قول قويدى. بۇل قۇجاتتا الداعى ءۇش جىلدا مەملەكەت قانشا قارجى جيناپ، قالاي جۇمسايتىنى، سونىڭ ىشىندە الەۋمەتتىك تولەمدەر مەن بازالىق كورسەتكىشتەردىڭ مولشەرى ايقىندالعان.