ءماجىلىس دەپۋتاتتارى 2025 جىلعى 29 جەلتوقساندا پالاتانىڭ پلەنارلىق وتىرىسىندا سەنات ەنگىزگەن تۇزەتۋلەردى قۇرىلىس كودەكسىنە ماقۇلدادى، دەپ حابارلايدى aqshamnews.kz
بۇل قۇجات پارلامەنتتە تولىق قابىلدانعان دەپ ەسەپتەلەدى جانە مەملەكەت باسشىسىنا قول قويۋعا جولدانادى. دەپۋتات مۇرات ابەنوۆ اتاپ وتكەندەي، قۇرىلىس كودەكسى ءماجىلىس ارقىلى 2025 جىلعى 26 قاراشادا قابىلدانىپ، 1038 پوزيسياسى بار تۇزەتۋلەرمەن سەناتقا جولدانعان بولاتىن.
"سەنات كەستەسى 27 پوزيسيادان تۇرادى. سەنات ەنگىزگەن تۇزەتۋلەر ناقتىلاۋشى سيپاتتا جانە ءماجىلىس قابىلداعان كودەكستىڭ تۇجىرىمدامالىق قاعيداتتارىن وزگەرتپەيدى"، – دەدى ول.
دەپۋتاتتىڭ ايتۋىنشا، سەنات ماسليحاتتار مەن اكىمدىكتەردىڭ قۇزىرەتتەرىن ناقتىلاۋدى ۇسىنعان.
اتاپ ايتقاندا:
26-باپتىڭ 1-تارماعىندا تۇرعىن ءۇي قورى ەرەجەلەرىن بەكىتۋ قۇزىرەتى 1) تارماقشادان 3) تارماقشاعا اۋىستىرىلعان؛
28-باپتىڭ 1-تارماعى 31) تارماقشاسى "جانە وبلىستىق ماسليحاتقا بەكىتۋگە ۇسىنۋ" دەگەن سوزدەرمەن تولىقتىرىلعان، ال 2-تارماقتىڭ 32) تارماقشاسى "جانە قالالىق ماسليحاتقا بەكىتۋگە ۇسىنۋ" دەپ تولىقتىرىلعان؛
29-باپتىڭ 1-تارماعى 1) تارماقشاسىنا "جانە ەلدى مەكەندەردىڭ دامۋ جانە قۇرىلىس سحەمالارى" دەگەن سوزدەر قوسىلعان؛ 2) تارماقتىڭ 8) تارماقشاسى جانە 3) تارماقتىڭ 8) تارماقشاسىندا "قالا قۇرىلىسىنىڭ جوبالارى (جەتكىلىكتى جوسپارلاۋ جوبالارى)، وتكەن" دەگەن سوزدەر "جەتكىلىكتى جوسپارلاۋ جوباسى، وتكەن" دەپ اۋىستىرىلعان؛
سونىمەن قاتار 69، 98 جانە 101-باپتاردىڭ جوبالىق قۇجاتتامانى ازىرلەۋ جانە كەلىسۋ بولىگىندەگى رەداكسياسى ناقتىلاتىن بولعان.
"ەكونوميكالىق رەفورما جانە ايماقتىق دامۋ كوميتەتى سەنات ەنگىزگەن وزگەرىستەر مەن تولىقتىرۋلاردى قۇرىلىس كودەكسىنە ەنگىزۋگە كەلىسۋگە بولادى دەپ ەسەپتەيدى"، – دەدى مۇرات ابەنوۆ.
سونداي-اق سول كۇنى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋلەت، قالا قۇرىلىسى جانە قۇرىلىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا تۇزەتۋلەر قابىلداندى.