اۋعانستاندا تۇراتىن قازاق دياسپوراسى بىرىككەن ۇلتتار ۇيىمىنىڭ ميگراسيا بويىنشا جاھاندىق ەلشىسى ديماش قۇدايبەرگەنگە رەسمي ۇندەۋ جولدادى، دەپ حابارلايدى aqshamnews.kz altyn-orda.kz-كە سىلتەمە جاساپ.
دياسپورا وكىلدەرى ديماش قۇدايبەرگەننىڭ بۇۇ اياسىنداعى مارتەبەسىن تاريحي وتانعا ورالۋ ماسەلەسىن شەشۋگە مۇمكىندىك دەپ باعالاپ وتىر. ۇندەۋدە اۋعانستاندا شامامەن 5 مىڭعا جۋىق قازاق تۇراتىنى، ولاردىڭ دەرەكتەرى مەن قاجەتتى قۇجاتتارى تولىق دايىن ەكەنى ايتىلعان.
اۋعانستان قازاق مادەني ورتالىعىنىڭ ءتوراعاسى اسادوللا ويماۋىتتىڭ مالىمەتىنشە، كوشى-قون شەكتەۋلەرىنە بايلانىستى قازاقستانعا ورالۋ ماسەلەسى ۇزاق ۋاقىتتان بەرى شەشىمىن تاپپاي كەلەدى. وسىعان بايلانىستى دياسپورا وكىلدەرى رەپاترياسيالىق باعدارلاماعا قوسۋعا جانە مادەني-گۋمانيتارلىق قولداۋ كورسەتۋگە جاردەم سۇراعان.
ۇندەۋ 2025 جىلدىڭ 25 جەلتوقسانىندا جولدانعان.