جاڭا جىل — ءاردايىم ءۇمىت پەن ىزگى نيەتكە تولى ەرەكشە كەزەڭ. بۇل ۋاقىتتا جۇرەكتەردە عاجايىپقا دەگەن سەنىم ويانىپ، شىنايى تىلەكتەردىڭ ورىندالۋىنا جول اشىلادى. وسىنداي سيقىرلى ساتتەردە جاسالعان ءاربىر يگى ءىس ايرىقشا ماڭىزعا يە. سول ىزگى باستامالاردىڭ جالعاسى رەتىندە بيىل جاڭا جىلدىق قۋانىش ق ر ءىىم ۇلتتىق ۇلانىنىڭ اسكەري بولىمدەرىنە دە جەتتى.
جاڭا جىل قارساڭىندا ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ مەرزىمدى اسكەري قىزمەتىن وتەپ جۇرگەن ساربازداردىڭ بەس بىردەي اسىل ارماندارىن ورىندادى. ەشقانداي ورىندالار دەگەن ءۇمىت پەن ەسەپسىز ايتىلعان تىلەكتەر كۇتپەگەن جەردەن شىندىققا اينالدى. بۇل — جاڭا جىل قارساڭىنداعى ىزگى نيەتتىڭ ايقىن كورىنىسى.
اسكەر قاتارىندا ارنايى ساۋالناما جۇرگىزىلىپ، ساربازدار ءوز تىلەكتەرىن بۇكپەسىز، اشىق جەتكىزدى. ولار قىزمەت بارىسىندا ارماندارىنىڭ ورىندالاتىنىن كۇتپەگەن ەدى. الايدا جاڭا جىل جاقىنداعان سايىن، ءتىپتى ەڭ قاراپايىم تىلەكتەردىڭ ءوزى ورىنداۋلى مۇمكىن ەكەنى تاعى ءبىر مارتە دالەلدەندى.
ماسەلەن، تاراز قالاسىنداعى 5513 اسكەري ءبولىمىنىڭ اسكەري قىزمەتشىسى الەكساندر ميروشين بۇرىن-سوڭدى ۇشاققا ءمىنىپ كورمەگەنىن جانە كوككە كوتەرىلۋدى ارماندايتىنىن جازعان. ونىڭ بۇل تىلەگى ۇلتتىق ۇلان باس قولباسشىسىنىڭ قولداۋىمەن ورىندالدى. ۇشۋدىڭ العاشقى ساتتەرىنەن-اق ساربازدىڭ قۋانىشى مەن تولقۋى ايقىن بايقالدى. شىنايى باقىت، قۋانىش سەزىمى ونى بۇكىل ساپار بويى جەتەلەپ وتىردى.
الايدا جاڭا جىلدىق قۋانىش مۇنىمەن اياقتالعان جوق. قونعان ساتتەن كەيىن الەكساندردى تاعى ءبىر توسىن سىي - اناسىمەن قاۋىشۋ كۇتىپ تۇردى.
ساربازدىڭ اناسى ناتاليا ميروشينا بۇل كۇنى تەك ۇلىنىڭ عانا ەمەس، ءوزىنىڭ دە ارمانى ورىندالعانىن جەتكىزدى. سەبەبى اسكەردەگى بالاسىمەن جۇزدەسۋ — جاڭا جىلدا كوپ وتباسىلار اڭسايتىن ەڭ قىمبات سىي.
ال الماتى قالاسىنداعى 5571 اسكەري ءبولىمىنىڭ اسكەري قىزمەتشىسى رايىمبەك باقىتبەك شوكولاد ونىمدەرىنىڭ قالاي دايىندالاتىنىن كورگىسى كەلەتىنىن جەتكىزگەن. باس قولباسشىنىڭ جاڭا جىلدىق تارتۋى رەتىندە وعان ەلىمىزدەگى تانىمال «راحات» كونديتەرلىك فابريكاسىنا ەكسكۋرسيا ۇيىمداستىرىلدى. سارباز ءتاتتى ونىمدەردىڭ ءوندىرىس تەحنولوگياسىمەن تانىسىپ، قازاقستاننىڭ تانىمال برەندىنە اينالعان فابريكانىڭ جۇمىسىن ءوز كوزىمەن كوردى.
الاتاۋ قالاسىنداعى 6654 اسكەري بولىمىندە قىزمەت ەتەتىن داستان نۇرلان جاڭا جىل قارساڭىندا بۇكىل روتاسىنا مەرەكەلىك كوڭىل كۇي سىيلاۋدى ارمانداپ، ءبىر جاشىك ماندارين تىلەدى. ۇلتتىق ۇلان باس قولباسشىسىنان كەلگەن سالەمدەمەنى ول وزىنە عانا قالدىرماي، قارۋلاس دوستارىمەن ءبولىسىپ، بولىمشەگە ورتاق قۋانىش سىيلادى.
وسكەمەن قالاسىنداعى 5518 اسكەري ءبولىمىنىڭ قاتارداعى جاۋىنگەرى ەلەربەك سۇلتانقۇلوۆ سۋرەت سالۋعا دەگەن قىزىعۋشىلىعىن قايتا جانداندىرعىسى كەلەتىنىن ايتقان. ونىڭ تىلەگى كۇتپەگەن ءارى اسەرلى ساتتە ورىندالدى. شىعارماشىلىققا ارنالعان قۇرال-جابدىقتار كەشكى تەكسەرىس كەزىندە تابىستالدى. بۇل سارباز ءۇشىن ەرەكشە ەستە قالارلىق ءسات بولدى.
وسى اسكەري بولىمدە قىزمەت ەتەتىن قاتارداعى جاۋىنگەر ءجۇنىس قارابايەۆتىڭ تىلەگى دە كوپشىلىكتىڭ جۇرەگىن ەلجىرەتتى. ول وتباسىنىڭ سۋرەتى بەينەلەنگەن شىنىاياق ارمانداعان. گەنەرال-مايور اڭساعان بالتابەكوۆ تابىستاعان بۇل سىي سارباز ءۇشىن تۋعان ءۇيىن، جاقىندارىن جانە الىستا جۇرسە دە سەزىلەتىن جىلۋلىقتى ەسكە سالاتىن قىمبات بەلگىگە اينالدى.
ايتا كەتۋ كەرەك، قازاقستان رەسپۋبليكاسى ءىىم ۇلتتىق ۇلانىندا مەرزىمدى اسكەري قىزمەتشىلەردىڭ ماتەريالدىق قامتاماسىز ەتىلۋىمەن قاتار، ولاردىڭ مورالدىق-پسيحولوگيالىق جاعدايىنا دا ەرەكشە كوڭىل بولىنەدى. ءاربىر ساربازعا دەگەن قامقورلىق — قىزمەتتىڭ ماڭىزدى قۇرامداس بولىگى.
جاڭا جىل قارساڭىندا ورىندالعان تىلەكتەر ساربازدار ءۇشىن قۇقىقتىق ءتارتىپ اسكەرلەرىندەگى قىزمەتتىڭ جارقىن ءارى جىلى ەستەلىگىنە اينالاتىنى ءسوزسىز. وسىنداي ساتتەردە قولباسشىلىق تاراپىنان كورسەتىلگەن قولداۋ مەن جاناشىرلىقتىڭ ماڭىزى ارتا ءتۇسىپ، اسكەري قىزمەتشىلەرگە دەگەن قامقورلىقتىڭ ءاردايىم باستى نازاردا ەكەنىن ايقىن كورسەتەدى.