يتاليا پارلامەنتىنىڭ تومەنگى پالاتاسى سەيسەنبى كۇنى ايەلدەردى ولاردىڭ جىنىسىنا بايلانىستى ولتىرگەنى ءۇشىن جازانى قاتاڭداتاتىن زاڭ جوباسىن قابىلدادى، - دەپ حابارلايدى Aqshamnews.kz.
بۇل تۋرالى تومەنگى پالاتانىڭ رەسمي سايتى حابارلادى.
جازانى كۇشەيتەتىن زاڭ جوباسى شىلدە ايىندا سەناتتا ماقۇلدانعان بولاتىن. زاڭ جوباسى قىلمىستىق كودەكسكە "فەمينيسيد" دەگەن جاڭا باپتى ەنگىزەدى. زاڭ بويىنشا، ايەلدى جىنىسىنا بايلانىستى جەك كورىنىش، كەمسىتۋ، بيلىكتى اسىرا پايدالانۋ، باقىلاۋ، ەركىندىگىن شەكتەۋ نەمەسە ەموسيونالدىق قارىم-قاتىناستان باس تارتقانى ءۇشىن ولتىرگەندەر ءومىر بويىنا باس بوستاندىعىنان ايىرىلۋى مۇمكىن. قازىرگى يتاليان زاڭناماسىندا فەمينيسيدكە جاتاتىن قىلمىستار ءۇشىن اۋىرلاتاتىن جازا قاراستىرىلعانىمەن، ونى جەكە باپ رەتىندە بولمەگەن.
Post باسىلىمىنىڭ جازۋىنشا، زاڭ جوباسى ءبىر اۋىزدان ماقۇلدانىپ، بارلىق 237 دەپۋتات قولدادى. زاڭ جوباسىن قاراۋ 25 قاراشادا اتالىپ وتەتىن ايەلدەرگە قارسى زورلىق-زومبىلىققا قارسى حالىقارالىق كۇنگە سايكەس كەلدى. پرەزيدەنت قول قويعاننان كەيىن قۇجات كۇشىنە ەنەدى.
يتاليانىڭ ۇلتتىق ستاتيستيكا ينستيتۋتى Istat مالىمەتىنشە، 2024 جىلى ەلدە 116 ايەل ولتىرىلگەن، ولاردىڭ 106-سى جىنىسىنا بايلانىستى قىلمىس رەتىندە قاراستىرىلۋى مۇمكىن. ولاردىڭ ىشىندە 62 ايەل قازىرگى نەمەسە بۇرىنعى سەرىكتەستەرى تاراپىنان ولتىرىلگەن.