وتكەن جىلعى قىركۇيەكتەگى پرەزيدەنتتىڭ حالىققا ارناعان جولداۋىندا ايتىلعان تاپسىرمالارىن جۇزەگە اسىرۋ بويىنشا جۇرگىزىلىپ جاتقان جۇمىستار تۋرالى تۋريزم جانە سپورت ءمينيسترى ەرمەك مارجىقپايەۆ، سونداي-اق بۇقارالىق ءتۋريزمدى دامىتۋ مەن ينۆەستورلاردى تارتۋدىڭ الەۋەتى جوعارى ءبىرقاتار ءوڭىردىڭ باسشىلارى بايانداما جاسادى.
وتكەن جىلدىڭ قورىتىندىسى بويىنشا تۋريزم سالاسى نەگىزگى كورسەتكىشتەر بويىنشا تاريحي ەڭ جوعارى دەڭگەيگە جەتتى. قازاقستانعا 9،2 ملن شەتەلدىك كەلدى، سونداي-اق وتاندىق تۋريستەر سانى 9،6 ملن ادامنان استى. ورنالاستىرۋ ورىندارى تۋريستەرگە 230 ملرد تەڭگەنىڭ قىزمەتى كورسەتىلىپ، قازىنا 450 ملرد تەڭگە سالىق تۇسىمىمەن تولىقتى. نەگىزگى كاپيتالعا سالىنعان ينۆەستيسيا كولەمى وتكەن جىلى 53%-عا ارتىپ، 787 ملرد تەڭگەنى قۇرادى. بيىل ءبىرىنشى توقساننىڭ قورىتىندىسى بويىنشا سالاعا سالىنعان ينۆەستيسيا 3 ەسەگە ءوسىپ، 177 ملرد تەڭگەگە جەتتى.
سونىمەن قاتار ولجاس بەكتەنوۆ ينۆەستيسيالار تارتۋ دەڭگەيىنىڭ تومەندەۋى تىركەلگەن، تۋريستىك الەۋەتى تولىق ىسكە اسىرىلماعان ءبىرقاتار ءوڭىردى اتاپ ءوتتى. بۇل – اتىراۋ، قاراعاندى، پاۆلودار، اقمولا، باتىس قازاقستان جانە جەتىسۋ وبلىستارى. ولاردىڭ اكىمدەرىنە ينفراقۇرىلىم ماسەلەلەرىن كەشەندى تۇردە شەشىپ، قىزمەت كورسەتۋ ساپاسىن تۇبەگەيلى جاقسارتۋ تاپسىرىلدى.
بۇگىنگى تاڭدا 82 ەلدىڭ ازاماتتارى قازاقستانعا ۆيزاسىز كەلە الادى، 29 ەلگە 108 باعىت بويىنشا حالىقارالىق اۋە قاتىناسى جۇزەگە اسىرىلادى.
الايدا تۋريستەر ىڭعايسىز دەمالىس ورىندارى مەن ونداعى سانيتاريالىق تالاپتارعا ساي كەلمەيتىن قولايسىز جاعدايلارعا مويىنسۇنۋعا ءماجبۇر. سونىمەن قاتار نارىقتا باسەكەنىڭ بولماۋى قىزمەت كورسەتۋ باعاسىنىڭ قىمباتتاۋىنا الىپ كەلەدى. باسەكە جوق جەردە، سەرۆيس ساپاسى دا اقساي بەرەتىنى انىق.
مۇنداي تاسىلدەر وزگەرمەيىنشە، سىرتقى تۋريزم كەڭىنەن تانىمال بولىپ قالا بەرەدى. بۇل رەتتە، قازاقستاننىڭ تابيعاتى مەن اسەم جەرلەرى ەلىمىزدە ەكولوگيالىق، مادەني، زيارات ەتۋ جانە ەمدىك-ساۋىقتىرۋ ءتۋريزمىن دامىتۋعا زور مۇمكىندىك بەرەدى.
سونداي-اق ۇكىمەت وتىرىسىندا «اتامەكەن» ۇكپ باسقارما ءتوراعاسى رايىمبەك باتالوۆ پەن Orient Finance Group كومپانيالار توبىنىڭ وكىلى رۋسلان شاەكين ءسوز سويلەدى. تۋريزم ينفراقۇرىلىمىن ودان ءارى دامىتۋ جانە سەرۆيستى جاقسارتۋ ماقساتىنداعى مەملەكەت پەن بيزنەستىڭ ءوزارا ءىس-قيمىل تەتىكتەرىنە نازار اۋدارىلدى.
پرەمەر-مينيستر مەملەكەت تاراپىنان تۋريستىك ايماقتاردا ينفراقۇرىلىم قامتاماسىز ەتىلىپ، ينۆەستورلار ءۇشىن قولايلى جاعداي جاسالاتىنىن اتاپ ءوتتى. ءوز كەزەگىندە بيزنەس تاراپى تۋريستىك اۋماقتاردى ۇقىپتى پايدالانۋدى جانە قولايلى باعامەن ساپالى قىزمەت كورسەتۋدى قامتاماسىز ەتۋى كەرەك. بۇل اۋە جانە تەمىرجول بيلەتتەرىنىڭ باعاسىنا دا قاتىستى. شاعىن ازاماتتىق اۆياسيا مۇمكىندىكتەرىن دە ءتۋريزمدى دامىتۋعا پايدالانۋعا بولادى.
«ول ءۇشىن كولىك مينيسترلىگى ينفراقۇرىلىمدى قايتا قاراپ، الەۋەتتى ينۆەستورلاردى تارتۋ ءۇشىن ءتيىستى جاعداي جاساۋى ءتيىس. سونىمەن قاتار قاۋىپسىزدىك ماسەلەلەرىن پىسىقتاپ، كورشىلەس ەلدەرمەن قاتار الىس شەتەلدەردىڭ دە تاجىريبەسىن زەرتتەپ كورۋ قاجەت. ەلىمىزدە تابيعي تۋريستىك ايماقتار شالعاي ورنالاسقان، سوندىقتان شاعىن اۆياسيانى دامىتۋ وتە وزەكتى بولىپ تابىلادى. كىشىگىرىم ۇشاقتار مەن تىكۇشاقتارعا بەتون جولاقتار قاجەت ەمەس، شاعىن ينفراقۇرىلىم سالسا جەتىپ جاتىر. بۇل ءبىزدىڭ تابيعي جانە تاريحي ايماقتارىمىزدىڭ الەۋەتىن ارتتىرىپ، تۋرلاردىڭ جاڭا پۋلىن قالىپتاستىرۋعا ىقپال ەتەدى»، — دەدى پرەمەر-مينيستر.
ماسەلەنى قاراۋ قورىتىندىسى بويىنشا ولجاس بەكتەنوۆ ءبىرقاتار تاپسىرما بەردى. اتاپ ايتقاندا، كولىك، تۋريزم جانە سپورت مينيسترلىكتەرى مەن اكىمدىكتەرگە دەمالىس ايماقتارىنداعى ينفراقۇرىلىم جوبالارىنىڭ اياقتالۋىن قامتاماسىز ەتۋ، سونداي-اق «سامۇرىق-قازىنا» قورىمەن بىرلەسىپ، پويىزدار سانىن كوبەيتىپ، اۆيابيلەتتەرگە باعا بەلگىلەۋ ماسەلەسىن شەشۋ تاپسىرىلدى.
بۇعان قوسا، تۋريزم جانە سپورت مينيسترلىگىنە ءوڭىر اكىمدىكتەرىمەن بىرلەسىپ، اگرو جانە ەكوتۋريزمدى دامىتۋ ماقساتىندا جاڭا جوبالار ازىرلەۋ قاجەت. سونىمەن قاتار اكىمدىكتەر جاڭا دەستيناسيا ورىندارى مەن تۋريستەردى تارتۋ ماسەلەسىن پىسىقتاۋى ءتيىس. سونداي-اق ىشكى ىستەر جانە توتەنشە جاعدايلار مينيسترلىكتەرىمەن بىرگە تۋريستىك نىسانداردىڭ جازعى ماۋسىمعا دايىندىعىن قامتاماسىز ەتىپ، ساياحاتتاۋشىلاردىڭ قاۋىپسىزدىگى شارالارىن قابىلداۋى قاجەت. ءوڭىر اكىمدەرى تۋريزم سالاسىن دامىتۋ ماسەلەسىن تىكەلەي باقىلاۋعا الادى.