الماتى وبلىسىنداعى تۇرمەلەردە زاڭ بۇزىلعان

تەكسەرۋ ناتيجەسىندە الماتى وبلىسىنىڭ پروكۋراتۋراسى، تۇزەۋ مەكەمەلەرىندە ەلەۋلى بۇزۋشىلىقتاردى انىقتادى.

سوتتالعاندار، ۇيالى تەلەفوندار پايدالانۋ ارقىلى ونلاين ساتىپ-الۋدى، كرەديتتەردى راسىمدەپ جانە بۋكمەكەرلىك كەڭسەلەر مەن ونلاين-كازينو ارقىلى قۇمار ويىندارعا قاتىسقان، وندا اقشا قاراجاتىنىڭ جالپى اينالىمى 3 ميلليارد تەڭگەدەن اسادى، دەپ حابارلايدى Almaty-akshamy.kz.

№10-شى مەكەمەنىڭ سوتتالعاندارى ءموبيلدى قۇرىلعىلاردى قولدانا وتىرىپ، رۇقسات ەتىلگەن جانە تىيىم سالىنعان زاتتاردى مەكەمە ىشىندە ساتقان.

بۇل دەرەك بويىنشا الماتى وبلىسىنىڭ پروكۋراتۋراسىمەن قك-نىڭ 361-بابى 2-1-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلدى.

ىلە اۋداندىق سوتىنىڭ ۇكىمىمەن وسى مەكەمەنىڭ ءۇش قىزمەتكەرىنە ءتۇرلى جازالاۋ شارالارى قابىلداندى.

بۇدان باسقا، وبلىس پروكۋراتۋراسى قك-نىڭ 361-بابى 2-1-بولىگى بويىنشا №12 جانە №57 مەكەمەلەردىڭ قىزمەتكەرلەرىنە قاتىستى سوتقا دەيىنگى تەرگەپ-تەكسەرۋدى باستادى، №57 مەكەمە باستىعىنا قاتىستى قاماۋدا ۇستاۋ تۇرىندەگى بۇلتارتپاۋ شاراسى قولدانىلدى. ​

انىقتالعان دەرەكتەر، قىلمىستىق-اتقارۋ جۇيەسىندەگى مەكەمە قىزمەتكەرلەرىنىڭ قاتىسۋىمەن بۇزۋشىلىقتاردىڭ جالعاسىپ جاتقاندىعىن ايعاقتايدى.

تەرگەۋ جالعاسىپ جاتىر جانە قازىرگى ۋاقىتتا قپك-نىڭ 201-بابىنا سايكەس وزگە اقپارات جاريالانۋعا جاتپايدى.