2024 جىلى قازاقستاندىقتارعا الەۋمەتتىك-ەڭبەك سالاسىندا پرواكتيۆتى فورماتتا 1،5 ملن-نان استام ءتۇرلى مەملەكەتتىك قىزمەتتەر كورسەتىلدى.
كورسەتىلگەن قىزمەتتەردىڭ سانى 2023 جىلمەن سالىستىرعاندا 200 مىڭعا ءوستى، دەپ حابارلايدى aqshamnews.kz.
پرواكتيۆتى فورمات بەلگىلى ءبىر ومىرلىك جاعداي تۋىنداعان كەزدە قانداي دا ءبىر قىزمەت كورسەتۋدىڭ ءوتىنىشسىز ءتارتىبىن كوزدەيدى. بارلىق قاجەتتى مالىمەتتەر مەملەكەتتىك دەرەكتەر قورىنان ەلەكتروندى تۇردە جينالادى. ول ءۇشىن ازاماتتارعا ەشقايدا بارۋدىڭ قاجەتى جوق، تەك SMS-حابارلاماعا جاۋاپ بەرسە جەتكىلىكتى.
پرواكتيۆتى قىزمەتتەردىڭ ءبىر بولىگى وتباسىنىڭ سيفرلىق كارتاسى ارقىلى كورسەتىلەدى، ول اۆتوماتتى رەجيمدە ءال-اۋقات دەڭگەيىن، سونداي-اق مەملەكەتتىك قولداۋدىڭ ءتيىستى شارالارىن ايقىندايدى. ونى ەنگىزۋدىڭ ارقاسىندا 2024 جىلى 642 مىڭنان استام ادام مەملەكەتتىك قىزمەتتەردى پرواكتيۆتى كورسەتۋ ءۇشىن SMS الدى. بۇل رەتتە ءوتىنىشسىز جاردەماقى نەمەسە تولەم الۋ مۇمكىندىگىن 263 مىڭ ادام پايدالاندى.
2024 جىلعى اقپاندا تاعى ءبىر مەملەكەتتىك قىزمەت، اتاپ ايتقاندا «مۇگەدەكتىگى بار بالالاردى ۇيدە وقىتۋعا جۇمسالعان شىعىنداردى وتەۋ» قىزمەتى پرواكتيۆتى فورماتقا اۋىستىرىلدى.
وسىلايشا، بۇگىنگى تاڭدا پرواكتيۆتى فورماتتا الەۋمەتتىك-ەڭبەك سالاسىندا 28 مەملەكەتتىك قىزمەت كورسەتىلەدى. ولاردىڭ ىشىندەگى ەڭ سۇرانىسقا يەلەرى:
- جۇمىسسىز ازاماتتاردى تىركەۋ (771 مىڭ)؛
- بالا تۋۋىنا جانە بالا كۇتىمى بويىنشا جاردەماقى تاعايىنداۋ (218 مىڭ)؛
- بالا كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەم تاعايىنداۋ (172 مىڭ)؛
- ينفلياسيا دەڭگەيىن ەسكەرە وتىرىپ، ناقتى ەنگىزىلگەن مىندەتتى زەينەتاقى جارنالارىنىڭ، مىندەتتى كاسىپتىك زەينەتاقى جارنالارىنىڭ سوماسى مەن زەينەتاقى جيناقتارىنىڭ سوماسى (مەملەكەتتىك كەپىلدىك) اراسىنداعى ايىرمانى تولەۋ (177 مىڭ)؛
- مۇگەدەكتىكتى جانە/نەمەسە ەڭبەككە قابىلەتتىلىگىنەن ايىرىلۋ دارەجەسىن بەلگىلەۋ جانە/نەمەسە قاجەتتى الەۋمەتتىك قورعاۋ شارالارىن ايقىنداۋ (97 مىڭ).
سونىمەن بىرگە جەكەلەگەن قىزمەتتەردى تۇرلەندىرۋ جانە جەڭىلدەتۋ بويىنشا دا جان-جاقتى جۇمىستار جۇرگىزىلۋدە.
اتاپ ايتقاندا، 30 نوزولوگيا بويىنشا مۇگەدەكتىك توبىن بەلگىلەۋ ءۇشىن مەديسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا پيلوتتىق جوبانى ىسكە اسىرۋ جالعاسۋدا. 2024 جىلى وسىنداي فورماتتا 97 مىڭعا جۋىق ءوتىنىم قارالدى.
سونداي-اق مۇگەدەكتىگى بار ادامدارعا الەۋمەتتىك قىزمەتتەر پورتالى ارقىلى تەحنيكالىق قۇرالدار مەن وڭالتۋ قىزمەتتەرىن ءوندىرۋشى مەن جەتكىزۋشىنى ءوز بەتىنشە تاڭداۋ مۇمكىندىگى قولجەتىمدى. 2024 جىلى 1،1 ميلليوننان استام تاپسىرىس ورىندالدى.