Silk Way تەلەارناسىندا اعىلشىن تىلىندە New Time جاڭالىقتار قىزمەتى ءوز جۇمىسىن باستادى.
اعىلشىن تىلىندەگى جاڭا اقپاراتتىق-ساراپتامالىق باعدارلاما الەمنىڭ 118 ەلىندەگى حالىقارالىق اۋديتورياعا ارنالعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«New Time باعدارلاماسىنىڭ كونتەنتى شەتەلدىك كورەرمەندەردىڭ ورتالىق ازيادا بولىپ جاتقان وقيعالارعا دەگەن قىزىعۋشىلىعىنىڭ ارتۋىنا بايلانىستى جاساقتالدى. ءقازىر قارقىندى دامىپ كەلە جاتقان بۇل وڭىرگە الەمدىك اۋديتوريانىڭ نازارى اۋىپ وتىر. Silk Way ارناسىنداعى New Time ەفيرىندە ءبىز كوپشىلىك كورەرمەنگە قازاقستان مەن ورتالىق ازياداعى وزەكتى ساياسي، ەكونوميكالىق، مادەني جانە سپورت جاڭالىقتارىن ۇسىنامىز. بۇدان باسقا قازاقستاندىق جانە حالىقارالىق ساراپشىلاردىڭ ارنايى شولۋىن ازىرلەيمىز»، — دەدى پرەزيدەنت ترك باسقارۋشى ديرەكتورى ەركەجان كۇنتۋعان.
New Time — Jibek Joly تەلەارناسىنان كورسەتىلەتىن «جاڭا ۋاقىت» جانە «نوۆوە ۆرەميا» اقپاراتتىق-ساراپتامالىق باعدارلامالارىنىڭ اعىلشىن تىلىندەگى نۇسقاسى.
جاڭالىقتاردىڭ جۇرگىزۋشىسى — اينۇر يمانعالي الەمگە ايگىلى «BBC Scotland»، «دجوردجيا ۋنيۆەرسيتەتى» جانە Deutsche Welle سياقتى مەدياكومپانيالاردا تاجىريبەدەن وتكەن.
ول سونداي-اق، پرەزيدەنت ترك جەتەكشى ماماندارىمەن بىرگە استاناداعى MNU ۋنيۆەرسيتەتى جانىنداعى حالىقارالىق جۋرناليستيكا مەكتەبىندە ستۋدەنتتەرگە ءدارىس وقيدى.
Silk Way ارناسىنداعى جاڭا باعدارلامانى كورەرمەندەر اپتا سايىن ءار جۇما كۇنى استانا ۋاقىتىمەن تۇنگى ساعاتا 00:00 كورە الادى. ال قازاقستاندا باعدارلاما تەلەارنانىڭ سايتى مەن الەۋمەتتىك جەلىدەگى رەسمي پاراقشالارىندا تىكەلەي ەفيردە كورسەتىلەدى.
Silk Way — الەمنىڭ 118 ەلىنە اعىلشىن تىلىمەن قوسا 5 تىلدە حابار تاراتاتىن قازاقستانداعى العاشقى ۇلتتىق سپۋتنيكتىك تەلەارنا. ول ق ر پرەزيدەنتى تەلەراديوكەشەنىنىڭ قۇرىلىمىنا كىرەدى.
ارنانىڭ كونتەنتى 100% وتاندىق تەلەونىمدەردەن تۇرادى.