ارميا ويىندارىنىڭ كەزەكتى كونكۋرستىق كۇنى قازاقستاندىقتار ءۇشىن ءساتتى اياقتالدى.
قورعانىس مينيسترلىگىنىڭ مالىمەتىنشە، «تانك بياتلونى» كونكۋرسىنداعى جەكە جارىس اينالىمىنىڭ ءساتتى ءوتۋى، «الەم جاۋىنگەرى» اسكەري-كاسىبي شەبەرلىك كەزەڭىندەگى جانە «سۇڭقار اڭشىلىعى» اۋە بارلاۋىنداعى ءبىرىنشى ورىن – ارميا حالىقارالىق ويىندارىنىڭ كەزەكتى كونكۋرستىق كۇنىنىڭ قورىتىندىلارى وسىنداي، دەپ حابارلايدى Almaty-akshamy.kz.
ماسكەۋ ماڭىنداعى «الابينو» پوليگونىنداعى سايىستا العاشقى قازاقستاندىق ەكيپاج قۇرامى كاپيتان ابدۋلحاكىم دۇيسەنوۆ، 3-سىنىپتى سەرجانت سۇڭعات ءسادۋاقاسوۆ جانە اعا سەرجانت دۋمان بايجانوۆ جوعارى كاسىبي شەبەرلىكتەرىن كورسەتتى. «تانك بياتلونى» كونكۋرسىنىڭ جەكە جارىس اينالىمىندا تانكيستەر جەڭىسكە جەتتى. قازاقستاندىقتار بارلىق نىسانداردى ءساتتى باعىندىرىپ، كەدەرگىلەردى تۇزەتۋلەرسىز جەڭدى. وسىلايشا ازەربايجاننان، بەلارۋس جانە سەربيادان كەلگەن قارسىلاستارىنا ەش مۇمكىندىك قالدارمادى.
ريازاندا ءوتىپ جاتقان «دەسانت ۆزۆودى» سايىسىنا قاتىسۋشىلار قويان-قولتىق كۇرەستىڭ جەكپە-جەگىندە كەزدەستى. ەلىمىزدىڭ اتىنان شىققان ەفرەيتور ولجاس ەرجان 70 كەلىگە دەيىنگى سالماق دارەجەسىندە ەكىنشى ورىن السا، 70-تەن 80 كەلىگە دەيىنگى سالماق دارەجەسىندە كاپيتان جاسۇلان مۇسەركەنوۆ ءۇشىنشى ورىن الدى، 80 كەلىدەن جوعارى سالماق دارەجەسىندە قازاقستاندىق اسكەري قىزمەتشى اعا سەرجانت مەيىرجان قوجانتايەۆ بۇلتارىسسىز جەڭىسكە جەتتى. قويان-قولتىق ۇرىستىڭ قورىتىندىسى بويىنشا رەسەيلىك دەسانتشىلار ۇزدىك دەپ تانىلىپ، ەكىنشى ورىن قازاقستانعا، ءۇشىنشى ورىن بەلارۋس ەلىنە بۇيىردى.
«الەم جاۋىنگەرى» كونكۋرسىنىڭ قاتىسۋشىلارى ءبىرىنشى كەزەڭدە جاۋىنگەرلىك دايارلىق جاتتىعۋلارىنىڭ كەشەنىن ورىندادى. وعان لابيرينتتەر مەن ۇيىندىلەردەن وتۋدەن باستاپ، وق اتۋ جاتتىعۋلارى مەن حيميالىق قورعانىس نورماتيۆتەرىن ورىنداۋ سىندى جاتتىعۋلاردى قوسقاندا جالپى ون بەس جاتتىعۋ ءتۇرى كىرەدى. اسكەري-شەبەرلىكتى ايقىندايتىن سايىستا قازاقستان اسكەري قىزمەتشىلەرى ۇزدىك اتاندى، بەلارۋس كومانداسىنىڭ وكىلدەرى – ەكىنشى ورىندا، ءۇشىنشى ورىندا – رەسەي.
قازاقستاندىق اسكەري قىزمەتشىلەر «سۇڭقار اڭشىلىعى» كونكۋرسىندا اۋە بارلاۋىن جۇرگىزۋدە ۇزدىك دەپ تانىلدى.
بارلىق تابىلعان نىسانداردى وبەكتيۆتى باقىلاۋدا ەڭ ۇزدىك ۋاقىت پەن ماتەريالدى تولىق جيناپ كورسەتكەن قازاقستان كومانداسى بەلارۋس جانە رەسەي كومندالارىن ارتتا قالدىردى.