وڭتۇستىك كورەيانىڭ ەكس-پرەزيدەنتى پاك كىن حەگە راقىمشىلىققا ءىلىندى

ەندى ەكس-پرەزيدەنت بوستاندىققا شىعادى

كورەيا رەسپۋبليكاسىنىڭ بيلىگى سىبايلاس جەمقورلىق جانە قىزمەتتىك وكىلەتتىگىن اسىرا پايدالاندى دەگەن ايىپپەن 22 جىلعا سوتتالعان بۇرىنعى پرەزيدەنت پاك كىن حەگە راقىمشىلىق جاسايدى، دەپ حابارلايدى Almaty-akshamy.kz

اگەنتتىك مالىمەتىنشە، 69 جاستاعى پاك كىن حە جاڭا جىل قارساڭىندا راقىمشىلىققا ىلىنەتىن ادامداردىڭ تىزىمىنە ەنگىزىلگەن.

ءتيىستى شەشىم ونىڭ دەنساۋلىق جاعدايىن ەسكەرە وتىرىپ، گۋمانيتارلىق سەبەپتەرمەن قابىلدانعان. 2019 جىلى پاك كىن حە يىعىنا وتا جاساتقان، ال بيىل ەكس-پرەزيدەنت يىق پەن ومىرتقاداعى سوزىلمالى اۋرۋعا بايلانىستى ءۇش رەت اۋرۋحاناعا تۇسكەن. پاك كىن حە توڭىرەگىندەگى ساياسي جانجال 2016 جىلدىڭ قازان ايىندا ونىڭ قۇربىسى چحۆە سۋن ءسيلدىڭ مەملەكەت باسشىسىنا اسەرى تۋرالى اقپارات باسپاسوزدە پايدا بولعان كەزدە تۋدى. جانجالعا قاتىستى تەرگەۋ ونىڭ بىرنەشە جىل بويى ۇكىمەتتىڭ ەگجەي-تەگجەيىنەن حاباردار بولىپ، ساياسي شەشىمدەر قابىلداۋعا ارالاسقانىن كورسەتتى.

سونىمەن قاتار، پرەزيدەنتتىڭ قۇربىسى ءبىرقاتار كومپانيالارعا قىسىم كورسەتىپ، ونىڭ قاراماعىنداعى قورلارعا ونداعان ميلليون دوللار اۋدارۋعا ماجبۇرلەگەن.

سىبايلاس جەمقورلىق فاكتىلەرى جانە چحۆە سۋن ءسيلدىڭ مەملەكەتتىك قىزمەتكە زاڭسىز قاتىسۋ ارەكەتتەرى انىقتالعاننان كەيىن بۇكىل ەلدە ءىرى شەرۋلەر تولقىنى ءوتىپ، وعان قاتىسۋشىلار پرەزيدەنتتىڭ دەرەۋ وتستاۆكاعا كەتۋىن جاقتادى.

پارلامەنت شەشىمىمەن پاك كىن حە قىزمەتىنەن بوساتىلىپ، كەيىن قاماۋعا الىندى. وڭتۇستىك كورەيا ساراپشىلارىنىڭ پىكىرىنشە، ەلدىڭ بۇرىنعى كوشباسشىسىنىڭ بوساتىلۋى كەلەسى جىلدىڭ ناۋرىز ايىنداعى پرەزيدەنتتىك سايلاۋعا اسەر ەتەدى.