وڭتۇستىك افريكادا كوروناۆيرۋستىڭ جاڭا "وميكرون" نۇسقاسىنىڭ تارالۋى تۋرالى دەرەكتەردى تالداۋ بارىسىندا دارىگەرلەر ونىڭ SARS-CoV-2 باستاپقى نۇسقاسىنان ەكى ەسە جۇقپالى، ال "دەلتا" شتامىنان 36% جىلدام جۇعادى دەگەن قورىتىندى جاسادى
"وميكرون" - كوروناۆيرۋستىڭ جاڭا ءتۇرى (B. 1.1.529). ول وڭتۇستىك افريكا مەن افريكانىڭ باسقا مەملەكەتتەرىنىڭ اۋماعىندا وسى جىلدىڭ كۇزىنىڭ سوڭىندا تارالا باستادى. ءقازىر الەمنىڭ 80-نەن استام مەملەكەتىندە انىقتالدى، دەپ حابارلايدى Almaty-akshamy.kz
عالىمداردىڭ پىكىرىنشە، "وميكرون" "دەلتا" شتامىنا قاراعاندا الدەقايدا جۇقپالى، ءبىراق ازىرگە دارىگەرلەر بۇل تۇجىرىمدى تولىق راستاۋ ءۇشىن جەتكىلىكتى مالىمەتتەر جيناعان جوق. جاڭا زەرتتەۋدە كولۋمبيا ۋنيۆەرسيتەتىنىڭ (اقش) پروفەسسورى دجەففري شاماننىڭ باسشىلىعىمەن امەريكالىق دارىگەرلەر بۇل ولقىلىقتىڭ ورنىن تولتىردى.
عالىمدار وڭتۇستىك افريكانىڭ گاۋتەنگ پروۆينسياسىنداعى سوڭعى بىرنەشە اپتاداعى مالىمەتتەردى تالدادى. وسى دەرەكتەرگە سۇيەنە وتىرىپ، زەرتتەۋشىلەر وڭتۇستىك افريكادا SARS-CoV-2 تارالۋىنىڭ كومپيۋتەرلىك مودەلىن قۇراستىردى.
وندا جەرگىلىكتى دارىگەرلەردىڭ ينفەكسيانى قانشالىقتى ءجيى انىقتاعانى، پتر سىناقتارى جانە ۆيرۋس ۇلگىلەرىنە گەنومدىق تالداۋ جۇرگىزىلگەنى ەسكەرىلدى.
شامان مەن ونىڭ ارىپتەستەرى پاندەميانىڭ ءبىرىنشى جانە كەيىنگى تولقىندارى كەزىندە COVID-19 قوزدىرعىشىنىڭ قالاي تاراعانىن سالىستىردى.