وڭتۇستىك كورەيانىڭ وڭتۇستىك-باتىسىندا ورمان ورتىنەن 6 مىڭ گەكتاردان استام القاپ جانىپ كەتتى. ءورت سالدارىنان 4 ادام قازا تاۋىپ، تاعى 6 ادام اۋىر جاراقات الدى. قازىرگى ۋاقىتتا ءورت جالعاسۋدا، جانە ونى ءسوندىرۋ جۇمىستارى قارقىندى تۇردە جۇرگىزىلۋدە، دەپ حابارلايدى aqshamnews.kz
جەرگىلىكتى بيلىك تابيعي اپاتقا بايلانىستى ءقاۋىپتى ايماقتاردا توتەنشە جاعداي جاريالادى. قىزىل جالىن كەيبىر ەلدى مەكەندەرگە جەتىپ، تۇرعىندارعا ءقاۋىپ توندىرۋدە. ءقاۋىپتى ايماقتاردان 1،5 مىڭنان استام ادام ءقاۋىپسىز جەرگە كوشىرىلدى.
ءورتتى سوندىرۋگە 9 مىڭنان استام مامان مەن 100-دەن استام ارنايى تەحنيكا جۇمىلدىرىلدى. الايدا، ءورتتى ءسوندىرۋ جۇمىستارىنا جەلدىڭ قاتتى اسەر ەتىپ وتىرعانى اتاپ وتىلۋدە. جەلدىڭ كۇشەيۋى ءورتتىڭ تارالۋىن ودان ءارى قيىنداتۋدا، بۇل جاعداي ءورتتى تولىقتاي باقىلاۋعا الۋدى تەجەپ وتىر. ماماندار جاعدايدى باقىلاۋعا الۋ ءۇشىن بار كۇشىن سالىپ جۇمىس ىستەۋدە، ءبىراق ءورتتىڭ تولىق سوندىرىلمەۋى جانە ونىڭ تارالۋى ءالى دە ءقاۋىپ تۋعىزىپ وتىر.