قالا باسشىسىنىڭ تاپسىرماسىمەن العاش رەت 42 جىل ىشىندە قولعا الىنعان جاڭعىرتۋ جۇمىستارى 2024 جىلدىڭ قىركۇيەگىنەن باستاپ بيىلعى ناۋرىز ايىنا دەيىن جالعاستى. بۇل رەتتە، ۇلكەن كونسەرت زالىنىڭ تاريحي كەلبەتى مەن ءتۇپنۇسقالىق اكۋستيكالىق ديزاينى تولىق ساقتالدى. كورەرمەن زالىنىڭ ۇستىندە اسپالى شامداردان تۇراتىن ەرەكشە دىبىس تولقىندارىن باسقارۋ جۇيەسى بار.
ايتا كەتەيىك، وقۋشىلار سارايىنىڭ ءبىر بولىگى سانالاتىن ۇلكەن كونسەرت زالى جەرگىلىكتى ماڭىزى بار مەملەكەتتىك تاريحي ەسكەرتكىش. ول 1983 جىلدان بەرى جۇمىس ىستەپ كەلەدى جانە بالالار مەن جاسوسپىرىمدەرگە ارنالعان مادەني-تانىمدىق ءىس-شارالار وتكىزەتىن ەڭ ءىرى الاڭنىڭ ءبىرى رەتىندە تانىمال.
كونسەرت زالىنىڭ جالپى اۋماعى 1 168 شارشى مەتر. بۇل اۋماققا امفيتەاتر، ەكى كورەرمەندەر بالكونى، ءتورت تەحنيكالىق لوجا جانە ساحنا كىرەدى. جاڭعىرتۋ جۇمىستارى بارىسىندا ينتەرەر ەلەمەنتتەرى 1 639 شارشى مەتر اۋماقتا قالپىنا كەلتىرىلدى. دەكوراتيۆتى گيپستىك ەلەمەنتتەر، كورەرمەن ورىندىقتارى مەن ەدەن جابىنى جاڭارتىلدى. سونىمەن قاتار، زالعا سوڭعى بۋىن سيفرلىق ميكشەرلىك ءپۋلتى مەن جوعارى حالىقارالىق ستاندارتقا سايكەس كەلەتىن كەڭ جولاقتى كەڭىستىكتىك دىبىس جۇيەسى ورناتىلدى. جارىقتاندىرۋ جۇيەسى 100-دەن استام پروجەكتور مەن سوفيتتەرى بار ديناميكالىق جارىق جۇيەسىمەن تولىقتىرىلدى، بۇل ءتۇرلى فورماتتاعى ءىس-شارالارعا بەيىمدەلگەن.
جاڭعىرتۋ اياسىندا كونسەرت زالىنىڭ تاريحىندا العاش رەت اينالمالى ساحنا مەحانيزمى، بارلىق ساحنالىق قۇرىلىم، كۋليسالار، باس پەردە جانە ەلەكترمەن جابدىقتاۋ جۇيەسى تولىعىمەن جاڭارتىلدى. سونداي-اق، سيفرلىق باسقارۋ جۇيەسى بار جوعارى تەحنولوگيالىق LED-ەكراندار ورناتىلدى.
جاڭارتىلعان زال جاس الماتىلىقتار ءۇشىن ءىس-شارالار اۋقىمىن ايتارلىقتاي كەڭەيتەدى. تەاتر قويىلىمىنان باستاپ، ينتەراكتيۆتى شوۋ مەن سيفرلىق فورۋمعا دەيىن رەسپۋبليكالىق جانە حالىقارالىق دەڭگەيدەگى ءىس-شارالار وتكىزىلىپ، جىلىنا كەمىندە 40 000 بالانى قامتۋ جوسپارلانعان.
الماتى اكىمى ەربولات دوسايەۆتىڭ ايتۋىنشا، ۇلكەن كونسەرت زالىندا ن.ساس اتىنداعى بالالار مەن جاسوسپىرىمدەر تەاترىنىڭ قويىلىمدارى دا وتەدى، سەبەبى بالالار تەاترىندا ءقازىر رەكونسترۋكسيالاۋ جۇمىستارى قولعا الىنعان.
قالا باسشىسى جاڭعىرتۋدىڭ كەلەسى كەزەڭىندە وقۋشىلار سارايىنىڭ سىرتقى قاسبەتىن جاڭارتۋ جانە اينالاسىن كوركەيتۋ جوسپارلانىپ وتىرعانىن اتاپ ءوتتى.
بۇگىنگى تاڭدا وقۋشىلار سارايىندا 8 ءبىلىم بەرۋ باعىتى بويىنشا 237 ۇيىرمە مەن سەكسيا جۇمىس ىستەيدى. اتاپ ايتقاندا، كوركەم-ەستەتيكالىق جانە قولدانبالى ونەر، بالالار مۋزىكا مەكتەبى، دجاز باعىتىنا ارنالعان مۋزىكا مەكتەبى، ەكولوگيالىق-بيولوگيالىق ءبولىم، تۋريستىك-ولكەتانۋ ءبولىمى، بالالار باستامالارىن ۇيلەستىرۋ ءبولىمى، سپورت ءبولىمى جانە عىلىمي-تەحنيكالىق شىعارماشىلىق ءبولىمى.
جاڭعىرتۋدان وتكەن كونسەرت زالى وقۋشىلار سارايىنىڭ ۇيىرمەلەرىنە قاتىساتىن 15 100 بالاعا جانە بالالار مۋزىكا مەكتەبىندە، ورتالىق ازياداعى جالعىز بالالار دجاز مەكتەبىندە جانە مۋزىكا-ەستەتيكالىق باعىتتاعى ۇيىرمەلەردە (قوبىز، دومبىرا، فورتەپيانو، ساكسوفون، جەتىگەن، سكريپكا، فلەيتا، ۆوكال، تەرمە) ءبىلىم الاتىن 2 348 جاس مۋزىكانتقا ونەر كورسەتۋ مۇمكىندىگىن بەرەدى. ەسترادالىق-سيمفونيالىق، دجاز، دومبىرا وركەسترلەرى، سكريپكا انسامبلدەرى مەن حور ۇجىمدارى ءۇشىن ارنايى جاعداي جاسالعان.
