قازاقستان تاۋەلسىزدىك العان ساتتەن باستاپ نەبارى 33 جاسقا تولعان جاس مەملەكەت. ءبىراق جاسىنا قاراماستان، ءبىزدىڭ ەلىمىزدە ۇلكەن جانە ءورشىل جوسپارلار جۇزەگە اسىپ كەلەدى.
قوعام تالقىسىنداعى بۇگىنگى كۇننىڭ وزەكتى ماسەلەلەرىنىڭ ءبىرى – اەس سالۋ. بۇل ماسەلەدە جاستاردىڭ دا پىكىرىمەن ساناسىپ، وي ءبولىسۋدى ءجون ساناعاندارىڭىز ءۇشىن راحمەت ايتامىن.
قازىرگى زامانعى اتوم ەلەكتر ستانسيالارىن ەل ءۇشىن ەنەرگيا ءوندىرۋدىڭ نەگىزگى كوزى دەپ جانە ونى ءقاۋىپسىز تۇردە «جاسىل ەنەرگەتيكا» دەپ اتاۋعا بولادى. ويتكەنى، اتوم ەلەكتر ستانسيالارى – الەمدەگى ەلەكتر ەنەرگياسىنىڭ ماڭىزدى كوزدەرىنىڭ ءبىرى. اەس ارقىلى كوپتەگەن ەلدەر ەكونوميكالىق جانە الەۋمەتتىك دامۋداعى نەگىزگى ماسەلەلەرىن شەشىپ جاتىر. ماسەلەن، سوڭعى ۋاقىتتا ەلىمىزدە ەلەكتر قۋاتىنىڭ جەتىسپەۋشىلىگىنەن جەلدەتكىشتەردىڭ ءوشىپ قالىپ جاتاتىن جاعدايلار جيىلەپ كەتكەنىن بىلەمىز. مەنىڭ تۇسىنىگىمدە ءوز قىزمەتى ءۇشىن كومىر نەمەسە گازدى پايدالاناتىن جەو سياقتى بالامالى ەلەكتر ەنەرگياسىن وندىرۋشىلەرمەن سالىستىرعاندا، اەس ەنەرگيا تيىمدىلىگى بويىنشا ءابسوليۋتتى كوشباسشى بولا الادى. ونىڭ ارتىقشىلىقتارى كوپ، ماسەلەن، ەكولوگيالىق تازا ەنەرگيا: اتوم ەلەكتر ستانسيالارى كليماتتىڭ وزگەرۋىنىڭ نەگىزگى سەبەبى بولىپ تابىلاتىن كومىرقىشقىل گازى (سو2) سياقتى پارنيكتىك گازداردى اتموسفەراعا شىعارمايدى. ولار ءىس جۇزىندە اۋا مەن سۋدىڭ لاستانۋىنا ىقپال ەتپەيدى، بۇل قورشاعان ورتاعا اسەردى ازايتادى.
جالپى، اتوم ەلەكتر ستانسياسى، بۇل وتە جوعارى تەحنولوگيالىق جانە سەنىمدى كەشەن، وعان زاماناۋي جابدىقتار، جوعارى بىلىكتى كادرلار جانە ەڭ باستىسى، بۇل قاۋىپسىزدىكتىڭ زاماناۋي ءتاسىلى. سوندىقتان اەس سالۋ ءبىزدىڭ ەكونوميكامىز ءۇشىن اۋىر جانە ورتا ونەركاسىپتىڭ دامۋىنا جاڭا سەرپىن بەرەدى دەپ ويلايمىن.