قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ ازەربايجاننىڭ استاناداعى ەلشىلىگىنە بارىپ، اقتاۋ قالاسىنىڭ اۋەجايى ماڭىندا ورىن العان Az Airlines اۋە كومپانياسىنا تيەسىلى Embraer 190 ۇشاعىنىڭ اپاتىنا بايلانىستى كوڭىل ايتۋ كىتابىنا جازبا قالدىردى.
26 جەلتوقسان كۇنى ازەربايجاندا قارالى كۇن جاريالانىپ، قازا تاپقاندار ءبىر مينۋت ۇنسىزدىكپەن ەسكە الىندى.
«بۇل قيىن ساتتە قازاقستان ۇكىمەتىنىڭ جانە ءوز اتىمنان قازا تاپقانداردىڭ وتباسىلارىنا، تۋىستارى مەن جاقىندارىنا قايعىرىپ كوڭىل ايتامىن. ورنى تولماس اۋىر قايعىعا ورتاقتاسىپ، اپات سالدارىنان زارداپ شەككەندەردىڭ تەزىرەك ساۋىعىپ كەتۋىن، ازەربايجان حالقىنا سابىر مەن توزىمدىلىك تىلەيمىن. ءبىز باۋىرلاس ازەربايجانعا ءتيىستى كومەك قولىن سوزىپ، جان-جاقتى قولداۋ كورسەتەمىز»، — دەپ جازدى ولجاس بەكتەنوۆ.
بۇعان دەيىن پرەمەر-مينيستر قازا تاپقان قازاقستاندىقتاردىڭ تۋعان-تۋىستارىنا كوڭىل ايتىپ، زارداپ شەككەن ازەربايجان، رەسەي جانە قىرعىزستان ازاماتتارىنا جان-جاقتى قولداۋ كورسەتۋدى تاپسىردى. اقتاۋدا قازا تاپقانداردىڭ وتباسى مۇشەلەرىنە قاجەتتى كومەك كورسەتىلۋدە.