بۇگىن الماتى ءماسليحاتىنىڭ كەزەكتى حححIV سەسسياسى ءوتىپ، قالا ومىرىنە قاتىستى ءبىرقاتار ماڭىزدى شەشىمدەر قابىلداندى.
الدىمەن دەپۋتاتتار الماتىداعى 156 جاڭا كوشەگە اتاۋ بەرۋ تۋرالى ۇسىنىستى قولدادى. بۇل شەشىم تۇرعىنداردىڭ تۇرمىسىن جەڭىلدەتىپ قانا قويماي، حالقىمىزدىڭ ءبىرتۋار تۇلعالارىنىڭ ەسىمىن ۇلىقتاۋعا جول اشتى. قالا كارتاسىندا ماڭگىلىككە ساقتالاتىن اتاۋلاردىڭ قاتارىندا جازۋشى ءابدىجامىل نۇرپەيىسوۆ، اقىن مۇزافار الىمبايەۆ، عالىم قايىم مۇحامەدحانوۆ، ءتىلشى-عالىم ءابدۋالى قايدار، تۇركولوگ ءرابيعا سىزدىقوۆا، سۋرەتشى-مۋلتيپليكاتور امەن قايداروۆ، سپورتشى دەنيس تەن سىندى ەسىمدەر بار.
سونىمەن قاتار، قازاقستان مەن ۆەتنام اراسىنداعى دوستىقتى دارىپتەۋ ماقساتىندا ءبىر كوشەگە ۆەتنام حالقىنىڭ ۇلت-ازاتتىق قوزعالىسىنىڭ كوسەمى حو شي ءميننىڭ ەسىمى بەرىلمەك. بۇل – حالىقارالىق ىنتىماقتاستىقتىڭ بەلگىسى رەتىندە باعالاندى.
سەسسيادا بۇدان بولەك، قالا تۇرعىندارىنىڭ دارىلىك قامتاماسىز ەتىلۋىن كەڭەيتۋ ماسەلەسى ماقۇلداندى. ەندى قوسىمشا 10 ءتۇرلى نوزولوگيا بويىنشا 23 پاسيەنت جەرگىلىكتى بيۋدجەت ەسەبىنەن تەگىن دارى-دارمەكپەن قامتىلاتىن بولادى.
ال قىسقى كەزەڭدە جول قوزعالىسىنىڭ قاۋىپسىزدىگىن ساقتاۋ ءۇشىن سەسسيا شەشىمىمەن كۇشەيتىلگەن رەجيمدە جولداردى كۇتىپ-ۇستاۋ تارتىبىنە تولىقتىرۋلار ەنگىزىلدى. قار قالىڭ تۇسكەن جاعدايدا قالا كوشەلەرىندە تەحنيكا مەن جۇمىسشىلاردىڭ سانى جەدەل ارتتىرىلادى.