جەتىسۋ اۋدانىندا الماتىداعى ەڭ العاشقى ينكليۋزيۆتى بالالار ويىن الاڭى پايدالانۋعا بەرىلدى. ول «باقىتتى وتباسى» وتباسىن قولداۋ ورتالىعىنىڭ جانىندا، سەيفۋللين داڭعىلى مەن جانسۇگىروۆ كوشەسىنىڭ قيىلىسىندا ورنالاسقان.
اۋدان اكىمدىگىنىڭ مالىمەتىنشە، الاڭنىڭ باستى ەرەكشەلىگى – ونىڭ بارلىق بالاعا، سونىڭ ىشىندە ەرەكشە قاجەتتىلىكتەرى بار ۇل-قىزدارعا دا قولجەتىمدىلىگىندە. مۇندا بالالاردىڭ ەركىن ويناپ، دەنە شىنىقتىرىپ ءارى قوعامعا بەيىمدەلۋىنە جاعداي جاسالعان. بۇل باستاما شىن مانىندە تەڭ ءارى جايلى قالالىق ورتانى قۇرۋ جولىنداعى ماڭىزدى قادام بولىپ وتىر.
جەتىسۋ اۋدانى اكىمىنىڭ ورىنباسارى دانيار الكەباي ۇلىنىڭ ايتۋىنشا، جاڭا الاڭ «حالىق قاتىساتىن بيۋدجەت» باعدارلاماسى اياسىندا بوي كوتەرگەن.
"بۇرىن بۇل جەرلەردە ەسكى ۇيلەر بولعان. اينالما جول سالىنعاننان كەيىن اينالاسىندا بوس جەرلەردى ءساتتى پايدالانىپ، وسىنداي حالىققا پايدالى ايماقتار جاسادىق. بۇل ويىن الاڭىنىڭ باستى ەرەكشەلىگى – ونىڭ بارلىق بالاعا قولجەتىمدى بولۋى. مۇندا مۇمكىندىگى شەكتەۋلى بالالار دا ەركىن ويناپ، سپورتپەن اينالىسىپ، قاتارلاستارى سياقتى قوعامعا بەيىمدەلە الادى. ينكليۋزيۆتى ورتا ءاربىر بالانىڭ دامۋىنا جاعداي جاسايدى"، – دەدى ول.
الاڭنىڭ باستى نىشانى – ۇرپاقتار ساباقتاستىعىن، وتباسى قۇندىلىعىن جانە بىرلىكتى بەينەلەيتىن «باقىتتى وتباسى» ءمۇسىنى.
اشىلۋ سالتاناتىنا «باقىتتى وتباسى» ورتالىعىنىڭ وكىلدەرىمەن بىرگە الماتى قالالىق ءماسليحاتىنىڭ دەپۋتاتتارى مەن اۋدان اكىمدىگىنىڭ قىزمەتكەرلەرى قاتىستى.
اشىلۋ سالتاناتىنا كەلگەن بالالار اتا-انالارىمەن كەلىپ، اتكەنشەك تەۋىپ، ءتۇرلى ويىن قۇرىلعىلارىندا وينادى. انيماسيالىق كەيىپكەرلەر بۇلدىرشىندەرمەن بىرگە ويىن ۇيىمداستىرىپ، قوناقتار بالالارعا تاتتىلەر، بالمۇزداقتار تاراتتى.
كوپبالالى انا ايگەرىم كۋۆاتوۆا «بالالارىم شىن قۋانىپ ويناپ ءجۇر. مۇنداي الاڭدار كوپ بولسا، ءار وتباسى ءۇشىن ۇلكەن قولداۋ بولار ەدى»، – دەپ قۋانىشىمەن ءبولىستى. جانسۇگىروۆ كوشەسىنىڭ تۇرعىنى ايزادا باگيروۆا دا ريزاشىلىعىن ءبىلدىرىپ:
«بۇدان بىلاي بۇل جەرگە كۇندە كەلەمىز. بالالارىما ۇناپ جاتىر. مۇندا ويىن تۇرلەرى كوپ ەكەن. ءقاۋىپسىز ءارى قىزىقتى ورىن بولىپتى»، – دەدى.
جاڭا جوبانىڭ اياسىندا زاماناۋي ينكليۋزيۆتى سپورت جانە ويىن كەشەندەرى ورناتىلىپ، قاۋىپسىزدىك ءۇشىن 200-دەن استام جارىق شامى مەن 12 بەينەباقىلاۋ كامەراسى قويىلدى. سونداي-اق 22 ورىندىق پەن شاعىن ساۋلەتتىك نىساندار ورنالاستىرىلعان. تەرريتوريا كوگالداندىرىلىپ، جاسىل جەلەكتى كۇتىپ-باپتاۋ ءۇشىن سكۆاجينادان قۋات الاتىن اۆتوماتتى سۋارۋ جۇيەسى ىسكە قوسىلدى.
جاڭا ينكليۋزيۆتى الاڭ – الماتىنىڭ ءاربىر تۇرعىنىنا، اسىرەسە بالالارعا جاسالعان قامقورلىقتىڭ كورىنىسى دەسەك بولار. بۇل باستاما قالاداعى قولجەتىمدى ءارى تەڭ مۇمكىندىكتەر ورتاسىن كەڭەيتىپ، تۇرعىنداردىڭ كۇندەلىكتى ءومىرىن جانداندىرا تۇسەتىنى انىق.