رەسپۋبليكا سارايىنىڭ الدىنداعى اباي الاڭى ۇلكەن اشىق ساحناعا اينالىپ، وندا بىرەگەي Open Air گالا-كونسەرتى «مۇرا» ءوتتى. بۇل ءىس-شارا الماتى تۇرعىندارى مەن قوناقتارىنا قالا كۇنىنە، سونداي-اق، اباي اتىنداعى قازاق ۇلتتىق وپەرا جانە بالەت تەاترىنىڭ 92ء-شى ماۋسىمىنىڭ اشىلۋىنا ارنالعان ەرەكشە سىي بولدى، دەپ حابارلايدى اqshamnews.kz ءتىلشىسى.
كورەرمەندەر الەمدىك جانە ۇلتتىق كلاسسيكانىڭ ۇزدىك تۋىندىلارىن، ايگىلى ميۋزيكلدەر مەن فيلمدەردەن تانىمال شىعارمالاردى تىڭدادى. سيمفونيالىق وركەستر، حور، بالەت جانە تەاتردىڭ جەتەكشى سوليستەرى زاماناۋي ساحنالىق شەشىمدەرمەن، يننوۆاسيالىق جارىق ونەر كەسكىندەمەلەرىمەن جانە فۋتۋريستىك ەلەمەنتتەرى بار ەكسكليۋزيۆتى كوستيۋمدەرمەن ارلەنگەن باعدارلاما ۇسىندى. ءار تۋىندى جەكە ءبىر قويىلىم ىسپەتتى بولسا، بارلىعى بىرگە ءبىرتۇتاس سيقىرلى تەاتر كەڭىستىگىنە اينالدى.
اباي الاڭىن تاڭداۋدىڭ دا وزىندىك ءمانى بار. بيىل اباي قۇنانبايەۆتىڭ تۋعانىنا 180 جىل تولدى. تەاترعا ۇلى اقىننىڭ ەسىمى 1945 جىلى بەرىلگەن بولاتىن. ءدال وسى اباي الاڭىندا جينالعان جۇرت ونەردىڭ ءداستۇر مەن جاڭاشىلدىقتى توعىستىرعان زاماناۋي تىنىسىن سەزىنە الدى.
«مۇرا» گالا-كونسەرتى «عاسىر الدىنداعى ونجىلدىق» اتاۋىمەن وتەتىن جاڭا تەاتر ماۋسىمىن اشتى. كورەرمەندەر ونەرپازداردى ىستىق ىقىلاسپەن، ەرەكشە قوشەمەتپەن قارسى الدى. كوپشىلىكتىڭ ايتۋىنشا، قازاقستاندا مۇنداي اۋقىمدى open air بۇرىن-سوڭدى بولماعان. «مۇرا» كلاسسيكا مەن زاماناۋي تەحنولوگيانى ۇشتاستىرعان شىنايى مۋزىكا، بي جانە شابىت مەرەكەسى رەتىندە ەستە قالدى.
اباي اتىنداعى قازاق ۇلتتىق وپەرا جانە بالەت تەاترىنىڭ ديرەكتورى اينۇر كوپباساروۆا ءار نومىرگە ارناپ ارنايى كوستيۋمدەر، ماسكالار مەن باس كيىمدەر دايىندالعانىن ايتادى. ولار سۋرەتشى اينۇر ەرىمبەت پەن بۋتافورلىق جانە قۇيۋ سەحىنىڭ شەبەرلەرى گۇلنار تابانوۆا مەن گالينا تاشيەۆانىڭ قولىمەن جاسالعان.
«ءبىز الماتىلىقتارعا ناعىز سيقىرلى شوۋ سىيلاۋعا تىرىستىق. تەاتر ارتيستەرى وپەرا جانە بالەت كلاسسيكاسىنىڭ جاۋھارلارىمەن قاتار ايگىلى فيلمدەر مەن ميۋزيكلدەردىڭ ساۋندترەكتەرىن دە ورىندادى. مۇنىڭ ءبارى زاماناۋي ساحنالىق تەحنولوگيالارمەن ۇندەستىرىلدى. قويىلىمدى ارنايى شاقىرىلعان يتاليالىق سۋرەتشى گايتانو لا مەلا دايىندادى. جاساندى ينتەللەكتتىڭ كومەگىمەن تەاتردىڭ 1934 جىلدان بۇگىنگە دەيىنگى كورنەكتى تۇلعالارىنىڭ سۋرەتتەرىنە جان ءبىتىرىپ، ۇرپاقتار ساباقتاستىعىنىڭ نىشانىنا اينالدى. باعدارلامانى اڭىزعا اينالعان ديريجەر رەنات سالاۆاتوۆتىڭ يران-عايىپپەن بىرلەسىپ جازعان «قازاقستانىم» انىمەن تۇيىندەدىك. وسى كونسەرتتى وتكىزۋگە قولداۋ بىلدىرگەن الماتى قالاسى اكىمدىگىنە العىس ءبىلدىرىپ، بارشا الماتىلىقتى قالا كۇنى مەرەكەسىمەن قۇتتىقتايمىن!» – دەدى اينۇر كوپباساروۆا.