تابىسقا جەتۋدىڭ كىلتى – ءتوزىم مەن ەڭبەك

جۇمىسشى ماماندىقتار جىلى: پاۆلودارلىق جاستارعا تابىستى كارەرا ۇلگىلەرى كورسەتىلدى

پاۆلودارداعى دوستىق ۇيىندە جاستار «WorldSkills» چەمپيوناتىنىڭ جەڭىمپازدارىمەن كەزدەستى. 

كەزدەسۋدە سەرۆيس جانە تاماقتانۋ كوللەدجىنىڭ ستۋدەنتتەرى مەن تۇلەكتەرى ءوز جەتىستىكتەرىمەن ءبولىستى. ولاردىڭ اراسىندا 2024 جىلعى ۇلتتىق چەمپيوناتتىڭ جەڭىمپازى سانجار زەينۋللا دا بار. ول وڭىرلىك جانە رەسپۋبليكالىق دەڭگەيدەگى بايقاۋلاردا توپ جارىپ، ماسكەۋدىڭ «سينەرگيا» ۋنيۆەرسيتەتىندە وقۋ گرانتىن يەلەندى. كەلەر جىلى ول شانحايدا وتەتىن الەمدىك «WorldSkills» چەمپيوناتىندا قازاقستان نامىسىن قورعايدى.

سانجاردىڭ ايتۋىنشا، تابىسقا جەتۋدىڭ كىلتى – ءتوزىم مەن ەڭبەك.

چەمپيوناتقا دايىندىقتا وعان كوللەدج تۇلەگى، بىرنەشە مارتە جەڭىمپاز اتانعان ارتۋر لەيمان قولداۋ كورسەتكەن. ال تاعى ءبىر تۇلەك – اناتوليي ۆولوكيتين تۇركيادا تاجىريبەدەن ءوتىپ، حالىقارالىق سەرتيفيكاتقا يە بولعان.

وبلىستىق قحا جاستار قاناتىنىڭ ءتوراعاسى راميل سمايلوۆتىڭ سوزىنشە، جوبا 2019 جىلدان بەرى جۇزەگە اسۋدا. جاڭارتىلعان فورماتتىڭ باستى ماقساتى – وقۋشىلارعا تابىستى جاستاردىڭ تاجىريبەسىن كورسەتۋ جانە جۇمىسشى ماماندىقتاردىڭ دا ۇلكەن مۇمكىندىكتەرگە جول اشاتىنىن دالەلدەۋ.

كورمەدە ستۋدەنتتەردىڭ ديپلومدارى مەن ماراپاتتارى قويىلىپ، ولاردىڭ ەڭبەگى مەن جەتىستىكتەرى كوپشىلىككە تانىستىرىلدى.