الماتى قالاسى اكىمدىگى مادەنيەت باسقارماسىنىڭ ۇيىمداستىرۋىمەن قالا كۇنىنىڭ قارساڭىندا، 19 قىركۇيەك كۇنى اباي الاڭىندا «ءان قاناتىنداعى الماتى» اتتى ءداستۇرلى ءان كەشى جوعارى دەڭگەيدە ءوتتى.
الماتى قالاسى حح عاسىردىڭ 30-جىلدارىنان باستاپ ۇلت مادەنيەتىنىڭ ۇيىتقىسى، ورداسى قىزمەتىن اتقارىپ كەلەدى. ءداستۇرلى ونەردىڭ ءىرى وكىلدەرى، زەرتتەۋشىلەرى وسى قالادا تۇرىپ، ەڭبەك ەتتى. ءقازىر دە پروفەسسيونالدىق تيپتەگى ءداستۇرلى مۋزىكانىڭ ەڭ ءىرى وشاعى – الماتى.
مۇندا ەتنومۋزىكانىڭ بەلگىلى قايراتكەرلەرى، ءداستۇرلى دومبىراشى، قوبىزشى، سىبىزعىشى، انشى-تەرمەشىلەر ازىرلەيتىن ارناۋلى ورتا جانە جوعارى وقۋ ورىندارى، ونەر ۇجىمدارى شوعىرلانعان. قازاق كونە مۋزىكا اسپاپتارىنىڭ جەر بەتىندەگى جالعىز مۋزەيى مەن ەلىمىزدەگى جالعىز ءداستۇرلى ونەر تەاترى دا وسىندا.
ءداستۇرلى ءان كەشىنە رامازان ستامعازييەۆ، ساۋلە جانپەيىسوۆا، ەركىن شۇكىمانوۆ، ارداق يساتايەۆا، تىلەۋلەس قۇرمانعالييەۆ، نۇرجان جانپەيىسوۆ، امانگەلدى كۇزەۋباي، شولپان دارجانوۆا، ارمات يسلامعالييەۆ، جەڭىس ەرجانوۆ، ەلزا قارابالينا، تالعات ءابۋعازى، «سازگەن سازى» ەتنوگرافيالىق-فولكلورلىق ءانسامبلى قاتىستى.