الماتى اكىمىنىڭ ورىنباسارى الماسحان سماتلايەۆ كۇن سايىن تاڭعى ساعات 5:00-تە جۇمىس ساپارىن نىسانداردى ارالاۋدان باستايدى. مۇنداي كەستە جوبالاردىڭ ورىندالۋىن تۇراقتى باقىلاۋدا ۇستاپ، تۋىنداعان ماسەلەلەر بويىنشا جەدەل شەشىم قابىلداۋعا مۇمكىندىك بەرەدى، دەپ حابارلايدى اqshamnews.kz ءتىلشىسى.
ەڭ اۋەلى ول قالا اۋماعىندا ۇزىندىعى 23 شاقىرىم بولاتىن د.قونايەۆ اتىنداعى ۇلكەن الماتى كانالىنىڭ كۇردەلى جوندەۋىمەن تانىستى. قۇرىلىس 2026 جىلى قازان ايىندا اياقتالماق. الماسحان سماتلايەۆ بۇل جوبانىڭ قالا ءۇشىن ستراتەگيالىق ماڭىزى زور ەكەنىن اتادى، سەبەبى كانال سۋ رەسۋرستارىن ساقتاۋدى جانە تۇرعىنداردىڭ قاۋىپسىزدىگىن قامتاماسىز ەتەدى.
ودان كەيىن ۇزىندىعى 2 شاقىرىم بولاتىن بورالداي وزەنىنىڭ ارناسىن قايتا جاڭعىرتۋ جانە ىرگەلەس اۋماقتى اباتتاندىرۋ جۇمىستارىن كوردى. بۇل ءىس 2026 جىلى تامىزدا بىتەدى دەپ جوسپارلانعان. اكىمنىڭ ورىنباسارى قۇرىلىس قارقىنىن جەدەلدەتىپ، جۇمىس ساپاسىن قاداعالاۋ قاجەتتىگىن ايتتى. بۇل شارا تۇرعىن ۇيلەردى سۋ باسۋدان قورعاۋعا باعىتتالعان.
ساپار سوڭىندا سماتلايەۆ «قۇرىلىسشى» جانە «وجەت» شاعىناۋداندارىندا سالىنىپ جاتقان بەس كارىزدىك-سورعى ستانسياسىن كورىپ شىقتى. بۇل نىساندار 10 مىڭنان استام تۇرعىندى قامتۋعا ەسەپتەلگەن. جوسپار بويىنشا جوبا 2025 جىلى جەلتوقساندا اياقتالۋعا ءتيىس. بۇگىندە بەس ستانسيانىڭ تورتەۋى جوعارى دايىندىق ساتىسىندا تۇر. اكىمنىڭ ورىنباسارى مەردىگەرگە ساپانى باقىلاۋدى كۇشەيتىپ، قۇرىلىستى بەلگىلەنگەن مەرزىمدە اياقتاۋدى تاپسىردى.