الماتىنىڭ ناۋرىزباي اۋدانىندا سىرتقى جارىقتاندىرۋ جۇيەسىن سالۋ جانە دامىتۋ جۇمىسى جالعاسىپ جاتىر. جوبانىڭ نەگىزگى ماقساتى – جول قاۋىپسىزدىگىن ارتتىرۋ، تۇرعىندار ءۇشىن قولايلى ورتا قالىپتاستىرۋ جانە اۋداننىڭ كوشە-جول ينفراقۇرىلىمىن جاقسارتۋ. بۇل تۋرالى ناۋرىزباي اۋدانىنىڭ اكىمدىگى حابارلادى.
جۇمىس ەكى باعىت بويىنشا جۇرگىزىلىپ جاتىر. بيىل اقج جەلىسى اياسىندا اۋداننىڭ 29 كوشەسىندە سىرتقى جارىقتاندىرۋ ورناتۋ اياقتالدى. سونىمەن قاتار "حالىق قاتىساتىن بيۋدجەت" جوباسى بويىنشا تۇرعىنداردىڭ كوپتەپ جولداعان ءوتىنىشى نەگىزىندە بۇرىن جارىقتاندىرىلماعان 22 كوشەدە جارىقتاندىرۋ ورناتىلۋدا.
ءقازىر مەردىگەر ۇيىمدار جارىقتاندىرۋ تىرەكتەرىن مونتاجداۋ، شام ورناتۋ، كابەل جەلىلەرىن تارتۋ جانە ەلەكتر جەلىلەرىنە قوسۋ جۇمىستارىن جۇرگىزىپ جاتىر. بارلىق جۇمىس تەحنيكالىق تالاپ پەن قاۋىپسىزدىك نورمالارىنا ساي اتقارىلىپ جاتىر.
تۇرعىندار وزگەرىستىڭ تيىمدىلىگىن ايتىپ وتىر.
"بۇرىن كەشكى ۋاقىتتا كوشەدە قاراڭعى بولىپ، اسىرەسە بالالار ءۇشىن قاۋىپسىزدىك ماسەلەسى قيىن ەدى. ءقازىر جارىق، جايلى، كەش شىعۋدان قورىقپايمىز. اۋداننىڭ كوركەيۋىنە اتسالىسىپ جاتقان بارشاعا راقمەت"، – دەدى اۋدان تۇرعىنى سايدا فيلەنكوۆا.
اۋدان اكىمدىگىنىڭ مالىمەتىنشە، سىرتقى جارىقتاندىرۋ بويىنشا بارلىق جۇمىس كەزەڭدەرىن بيىل جىل سوڭىنا دەيىن اياقتاۋ جوسپارلانعان.