مادەنيەت جانە اقپارات مينيسترلىگى تاريحي تەاترلاردى قالپىنا كەلتىرۋ جانە جاڭعىرتۋ بويىنشا اۋقىمدى جۇمىستاردى جالعاستىرۋدا.
سونىڭ ىشىندە مۇحتار اۋەزوۆ اتىنداعى قازاق ۇلتتىق دراما تەاترى دا بار، دەپ حابارلايدى aqshamnews.kz.
مادەنيەت جانە اقپارات مينيسترلىگىنىڭ باسپا ءسوز قىزمەتى تاراتقان اقپاراتقا ساي، تەاتر عيماراتى سالىنعاننان بەرى كۇردەلى جوندەۋدەن وتپەگەن. ينجەنەرلىك جەلىلەرى مەن ماتەريالدىق-تەحنيكالىق بازاسى توزعاندىقتان ءورت ءقاۋپى جوعارى. عيمارات رەكونسترۋكسياسى تەاتردىڭ تاريحي كەلبەتىن ساقتاي وتىرىپ جۇرگىزىلەدى. ويتكەنى عيمارات جەرگىلىكتى ماڭىزى بار مادەني ەسكەرتكىش مارتەبەسىنە يە.
سونىمەن قاتار، دەمەۋشىلەر قاراجاتىمەن اباي اتىنداعى قازاق ۇلتتىق وپەرا جانە بالەت تەاترى عيماراتىندا ىشكى جوندەۋ جۇمىستارى جۇرگىزىلۋدە. ءقازىردىڭ وزىندە جەتى بولمە، ونىڭ ىشىندە وركەستر مەن حور زالدارى، مۋزەي، گريم بولمەلەرى، قابىلداۋ زالى جانە ت.ب. جاڭارتىلدى.
ناتاليا ساس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىندا دا كوپ وزگەرىس بولادى. عيماراتتىڭ كۇردەلى جوندەۋ بويىنشا جوبالىق-سمەتالىق قۇجاتتاماسى مەملەكەتتىك ساراپتامادان ءوتىپ جاتىر.
رەسپۋبليكالىق اكادەميالىق نەمىس دراما تەاترى دا نازاردان تىس قالمايدى. بۇرىنعى كينوتەاتر عيماراتىندا ورنالاسقان تەاتردى جوندەۋ جانە گازداندىرۋ ماسەلەسى ۇلتتىق ەكونوميكا مينيسترلىگىنىڭ قاراۋىندا تۇر.
مينيسترلىك سونىمەن قاتار 2025 جىلى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ عيماراتىنا ساراپتاما جۇرگىزۋدى جوسپارلاپ وتىر. ساراپتاما بارىسىندا ونىڭ كۇردەلى جوندەۋ جۇمىستارى بويىنشا الداعى جۇمىس كولەمى انىقتالادى.
ايتا كەتۋ كەرەك، 2020 جىلى ەلىمىزدىڭ مادەني مۇراسىن قولداۋداعى ماڭىزدى قادام –ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىنىڭ كۇردەلى جوندەۋ جۇمىستارىنىڭ اياقتالۋى.