ساياحاتشىنىڭ قانداي جاعدايدا كوز جۇمعانى ءالى بەلگىسىز
75 جاستاعى فرانسۋز ساياحاتشىسى جان-جاك ساۆەن مۇحيتتاعى ەكىنشى جەكە ساياحاتىندا قايتىس بولدى - ول اتلانت مۇحيتىن ەسكەكپەن كەسىپ وتپەك بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
BBC حابارلاعانداي جۇما كۇنى ساۆەننىڭ اۋدارىلعان قايىعى ساياحاتشى باستاعان پورتۋگاليادان ءبىر جارىم مىڭ شاقىرىمداي جەردە ازور ارالدارىنان تابىلدى.
ساۆەن قازاسىنىڭ سەبەپتەرى مەن جاعدايلارى ءالى بەلگىسىز.
«وكىنىشكە قاراي، بۇل جولى مۇحيت ءبىزدىڭ دوسىمىزدان كۇشتى بولدى، ول تەڭىزدى جانە وندا ساياحاتتاعاندى سۇيەتىن»، - دەلىنگەن ساۆەننىڭ Facebook پاراقشاسىندا.
ساۆەن 1 قاڭتاردا پورتۋگاليانىڭ ساگرەشىنەن اتلانت مۇحيتى ارقىلى ەكىنشى ساياحاتىنا شىقتى.
ءبىرىنشىسىن ول ءۇش جىل بۇرىن ۇلكەن، ارنايى سالىنعان بوشكەدە جاساعان. بەيسەنبىگە قاراعان ءتۇنى ساۆەن ەكى مارتە اپات سيگنالىن بەرگەن.
سودان كەيىن ونىمەن بايلانىس ۇزىلگەن. ول بۇعان دەيىن سارسەنبى كۇنى Facebook-تە قاتتى جەل ونىڭ جولىن 900 شاقىرىمعا ۇزارتقانىن جانە ونىڭ كۇن پانەلىمەن قيىندىقتارى بار ەكەنىن جازعان.
ءبىراق وقىرمانداردى الاڭدايتىن ەشتەڭە جوق جانە ول اقاۋلاردى تەز ارادا تۇزەتەتىنىنە سەندىردى.
بۇرىنعى دەسانتشى، كەيىنىرەك جەكە ۇشقىش بولعان ساۆەن وتكەن اپتادا 75 جاسقا تولعان تۋعان كۇنىن قايىعىندا شامپان ءىشىپ اتاپ ءوتتى.
ول ءوزىنىڭ سەگىز مەترلىك قايىعىمەن مۇحيتتى شامامەن ءۇش ايدا كەسىپ ءوتۋدى جوسپارلاعان. ول بۇل ارەكەتىن «كارىلىككە كۇلۋ ءتاسىلى» دەپ ساناعان.