ەلوردا كوشەلەرى ترامۆاي جەلىسىنە ىڭعايلى
استانالىق ساۋلەتشى ءامىر ءابىلوۆ LRT قۇرىلىسىنىڭ ورنىنا ترامۆاي قوعامدىق كولىك جەلىسىن سالۋدى ۇسىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءامىر ءابىلوۆ جەكەمەنشىك كومپانيادا جۇمىس ىستەيدى جانە قۇرىلىس نىساندارىنىڭ جوباسىن ازىرلەۋمەن اينالىسادى.
سالا بويىنشا تاجىريبەسىنىڭ ازدىعىنا قاراماستان ساۋلەتشى ەلوردانىڭ سول جاعالاۋىنداعى 5 بىردەي نىساننىڭ اۆتورى.
«ەلوردادا مەترو بولسا دەگەن بالا كۇنگى ارنانىم بولعان. دەگەنمەن مەترو سالۋ وڭايعا سوقپايتىنىن ءبىلىپ، ترامۆاي كولىگى ەسىمە ءتۇستى. ترامۆاي مەترو مەن LRT-عا قاراعاندا الدەقايدا ارزانعا تۇسەدى. ترامۆاي – امبەباپ كولىك جانە ەۋروپا ەلدەرى ونى قايتا جانداندىرىپ جاتىر. ترامۆاي كولىگىنىڭ دامۋ تاريحى وتكەن عاسىردىڭ 20 جىلدارىنا سايكەس كەلەدى. ەكىنشى دۇنيەجۇزىلىك سوعىستان كەيىن ترامۆايعا سۇرانىس ازايىپ، جەڭىل اۆتوكولىك جۇيەسى دامي ءتۇستى. ادامدار ماشينا الىپ، جولدار دا سوعان ساي سالىنا باستادى. 90-شى جىلدارى ەۋروپالىقتار جەڭىل اۆتوكولىك سانىنىڭ كوبەيۋىنە بايلانىستى، جولداردى كەڭەيتۋ ماسەلەنى شەشپەيتىنىن ءتۇسىندى. وسىلايشا ادامداردى جەڭىل كولىكتەن باس تارتىپ، قوعامدىق كولىككە وتىرعىزۋ يدەياسى تۋىندادى. اتالعان يدەيا ءبىر جاعىنان كەپتەلىس پروبلەماسىن شەشسە، ەكىنشى جاعىنان قالانىڭ ەكولوگياسىن جاقسارتادى»، - دەدى ءا. ءابىلوۆ.
ونىڭ ايتۋىنشا، ەلوردانىڭ كوشەلەرى ترامۆاي كولىگىنىڭ جەلىسىنە ىڭعايلى.
«مەن ترامۆاي جەلىسىنىڭ جوباسىن ازىرلەپ تە قويدىم. ونى كەزەڭ بويىنشا جۇزەگە اسىرۋعا بولادى. مىسالى، جاڭا مەشىتتەن ەكسپو-عا دەيىن، قابانباي باتىر داڭعىلىنان سامال شاعىن اۋدانىنا دەيىن جانە رەسپۋبليكا داڭعىلىنان ەسكى ۆوكزال اۋدانى ياعني گەتە كوشەسىنە دەيىن ترامۆايدى ىسكە قوسۋعا بولادى. ودان ءارى ءىستىڭ قالاي جۇرەتىنىن قاداعالاۋ ارقىلى كولىك جەلىسىن جەتىلدىرە تۇسۋگە بولادى»، - دەيدى ول.
ساۋلەتشى ءوز جوباسىن ازىرلەۋدە باتىس ەۋروپانىڭ ترامۆاي جەلىسىن نەگىزگە العان.
«2007 جىلى پاريجدە جاڭا ترامۆاي جەلىسى سالىندى. سونداي-اق، مارسەل قالاسىندا دا ترامۆاي جەلىسى جاقسى دامىعان. بۇگىندە بۇكىل ەۋروپادا اتالعان كولىك قاتىناسى جەلىسى قارقىندى دامۋ ۇستىندە»، - دەدى مامان.
ودان بولەك، ءامىر ءابىلوۆ استانالىقتار ءۇشىن قانداي ناسىنداردىڭ جەتىسپەيتىندىگىن ايتتى.
«مەنىڭشە، ەلوردادا مەكتەپ جەتىسپەيدى. سەبەبى تۇرعىن ءۇي كەشەندەرىنىڭ سانى ارتىپ جاتىر. وسى ورايدا قوعامدىق ورىنداردى كوبەيتۋ قاجەت. ارينە، قالا تۇرعىنى جانە ساۋلەتشى رەتىندە تۇرعىندار مەن قالا قوناقتارى ءۇشىن ىڭعايلى ينفراقۇرىلىمنىڭ بولعانىن قالايمىن»، - دەيدى استانالىق ساۋلەتشى.
ەسكە سالا كەتسەك، مەملەكەت باسشىسى قاسىم-جومارت توقايەۆ LRT قۇرىلىسىن سىنعا الىپ، ول بويىنشا وڭتايلى شەشىم قابىلداۋ قاجەتتىگىن ايتقان ەدى.