ىممەن سويلەسۋ ءبىلىم سالاسىندا عانا ەمەس، كوپشىلىك ورتادا اسىرەسە شىعارماشىلىق كەڭىستىكتەردە دە كەڭىنەن تارالىپ جاتىر. الەۋمەتتىك جەلىدە ۇلكەن كونسەرتتە تانىمال انشىلەردىڭ ءانىن ەرەكشە جاندارعا ىممەن جەتكىزىپ تۇرعان قىزدىڭ بەينەسىن كورگەن بولارسىز. جۇرت ونىڭ ارەكەتىنە ريزا بولىپ، ەستۋ قابىلەتىنەن ايىرىلعان جاندار شىنايى العىستارىن ءبىلدىرىپ جاتىر. كوپتىڭ باتاسىنا بولەنگەن ارۋ كىم؟ اqshamnews.kz ءتىلشىسى ءۇنسىز الەمگە ءتىل بىتىرگەن قاراعاندىلىق ارۋمەن سۇحباتتاستى.
ايدانا جاپاروۆا - كاسىبي سۋردواۋدارماشى. قاراعاندى قالاسىنىڭ تۋماسى، 31 جاستا. بۇگىندە ول ەلىمىزدەگى اۋقىمدى جوبالارعا ات سالىسىپ، قازاقستاندىق ارتىستەردىڭ ايگىلى اندەرىن ەستي المايتىن جاندارعا ىم تىلىمەن جەتكىزىپ وتىرادى. ءوز قىزمەتىن تەگىن ۇسىناتىن مەيىرىمدى جان، قيىن دا قىزىق كەزەڭدەردەن تۇراتىن ءومىر جولى جايلى تەبىرەنە اڭگىمەلەپ بەردى.
"مەن ەستۋ قابىلەتىنەن ايىرىلعان وتباسىندا ءوستىم"
ايدانانىڭ اتا-اناسى - ەستۋ قابىلەتىنەن ايىرىلعان جاندار. وسى سەبەپتەن دە ول كىشكەنتاي كەزىنەن ىم ءتىلىن ۇيرەنۋگە ءماجبۇر بولعانىن جانە بۇل ءتىلدىڭ ول ءۇشىن تەك سويلەسۋ قۇرالى ەمەس، ءومىرىنىڭ ءبىر بولىگىنە اينالعانىن ايتتى.
"اتا-انامنىڭ ەستۋ قابىلەتى كىشكەنتاي كەزىندە جوعالعان. سول سەبەپتى ءسىڭىلىم ەكەۋمىز كىشكەنتايىمىزدان ىم ءتىلىن يگەردىك. بۇل ءتىلدى ماعان انام ۇيرەتتى. ونى ۇيرەنۋ تابيعي پروسەسس سەكىلدى وتكەندىكتەن، ناقتى قالاي ۇيرەنگەنىم ەسىمدە جوق. اكەم ەرتە جاسىمدا ومىردەن ءوتتى. مەن اناممەن ۇنەمى بىرگە ەرىپ ءجۇرىپ، وعان كوپ دۇنيەنى اۋدارىپ بەرىپ وتىراتىنمىن. ىمداۋ ءتىلى - مەنىڭ تۋعان ءتىلىم سەكىلدى بولدى" دەيدى ايدانا.
سۋرەت: كەيىپكەردىڭ جەكە ارحيۆىنەن
ايدانا ءقازىر وتباسىلى. جارىمەن جانە التى جاسار قىزىمەن استانادا تۇرادى. ول كىشكەنتاي قىزىنىڭ دا ىم ءتىلىن مەڭگەرگەنىن، اجەسىمەن ەركىن سويلەسە الاتىنىن ايتتى.
"ارباعا تاڭىلىپ، قايتا تۇردىم"
تاعدىر ايداناعا توسىننان سىناق سىيلادى. كوللەدج وقىپ ءجۇرىپ، ديپلوم قورعاۋىنىڭ الدىندا دەنساۋلىعى كەنەت سىر بەرىپ، مۇگەدەك ارباعا قالاي بايلانعانىن ۇقپادى.
"اياعىمدى باسا الماي، سەزىمتالدىعىم جوعالا باستادى. انامدى اسا مازالاعىم كەلمەدى. ءوز دەنساۋلىعىما ءوزىم ءمان بەرىپ كورەيىن دەپ قارالا باستادىم. بارا-بارا اياقتان مۇلدە جۇرە الماي قالدىم. دارىگەرلەر ماعان "ىشكى قان تامىرلارىنىڭ جارىلۋى، جۇلىن ىسىگى" دەگەن دياگنوز قويدى. سولاي مەن پاراليچكە شالدىقتىم. قولدارىمدى دا قوزعالتا الماي قالدىم. جاقىندارىم بارىنشا ءقولداۋبىلدىردى. سول كەزدە ماعان وتا جاساعان حيرۋرگ "ءبارى وزىڭىزگە بايلانىستى، مىقتى بولساڭىز ءجۇرىپ كەتەسىز" دەگەن ەدى. ال ءومىر مەنى ونسىز دا مىقتى ەتىپ تاربيەلەگەن ەدى" دەدى ول.
ومىردەن مىقتى بولۋدى، قيىندىققا قارسى ءجۇرۋدى ۇيرەنگەن ول بۇل سىناققا دا مويىمادى. ەڭسەسىن تىك ۇستاپ، بار جىگەرىن جيناپ، تەك العا ۇمتىلدى.
"ءسىڭىلىم ماعان ۇلكەن قولداۋ ءبىلدىردى. مەن مۇگەدەك بولعىم كەلمەدى. وزىممەن وتە قاتتى جۇمىس جاسادىم. جۇلىن ىسىگىن كەتىرۋ ءۇشىن جاتتىعۋلار قاجەت بولدى. مەن وزىمە ماقسات قويىپ، سول ماقساتىما جەتتىم. ءبىر جارىم جىلدان كەيىن اياعىنىڭ ساۋساقتارى قوزعالا باستادى. بۇل ماعان كورىنگەن كىشكەنتاي عانا ءۇمىت ساۋلەسى ىسپەتتى كورىندى. مەن توقتاماي، ەمىمدى جالعاستىردىم. كەيىن اقىرىنداپ اياققا تۇرىپ، جۇرە باستادىم" دەيدى ايدانا.
ءبارى قالاي باستالدى؟
ايدانا جاپاروۆا العاش رەت Dequine ەسىمدى انشىمەن ونەر كورسەتتى. ىم تىلىمەن ءان ايتۋ ۇسىنىسىن كوپ انشىگە ايتقانىمەن، ەڭ ءبىرىنشى بولىپ قولداعان Dequine بولعان. العاشقى كونسەرتتە ايدانا ونىڭ بىردەن 6 ءانىن اۋدارمامەن ورىنداعان. ول ءوزىنىڭ قوبالجىعانىن، ءبىراق ىشتەي ارمانىنىڭ ورىندالعانىنا قۋانعانىن جاسىرمادى.
"ءبىز Dequine-مەن تانىسىپ، بىرگە دايىندالدىق. ول مەنىڭ ۇسىنىسىمدى قابىل الىپ، قولداۋ ءبىلدىردى. العاشقى ونەر كورسەتۋىم بولعاندىقتان وتە قاتتى قوبالجىدىم، ساحنادا تولىق اشىلا المادىم. كەيىننەن وزگە ارتىستەر دە بۇل ءتىلدىڭ ەرەكشە تىڭدارماندار ءۇشىن ماڭىزدى ەكەنىن ءتۇسىنىپ، ۇسىنىستى قابىلداپ باستادى" دەيدى جاپاروۆا.
ايدانا اندەردى ورىسشا ىمداپ جەتكىزەتىنىن ايتتى. سەبەبى بۇرىنعى كەڭەس وداعىنا كىرگەن ەلدەردىڭ ءبارى تەك ورىس ىمداۋ ءتىلىن قولدانادى ەكەن.
"ارينە، ەڭ قيىنى - رەپ. رەپ اۋەندەرىن اۋدارىپ جەتكىزۋ قيىنعا سوعادى. سونداي-اق، قازاقشادان ورىسشاعا اۋدارۋ دا وتە قيىن. سەبەبى قازاشا اندەردى سوزبە-سوز اۋدارا المايمىز. ونىڭ ماعىناسىن ورىسشاعا اۋدارىپ بارىپ جەتكىزۋىمىز كەرەك. ايتپەسە مىلقاۋ جاندار ونى دۇرىس تۇسىنبەي قالادى" دەدى ول.
ايدانانىڭ تىلەگى نە؟
ايدانا بۇدان بولەك استانادا ينكليۋزيۆتى تەاتردا قىزمەت ەتەدى. ول وندا قويىلىمداردى ىم تىلىندە جەتكىزىپ وتىرادى.
"تەاتردا جۇمىس ىستەۋدىڭ ءوزى - ءبىر الەم. ءار قويىلىم ءار ءتۇرلى كۇيدى جەتكىزۋگە ءماجبۇر ەتەدى. ءوزىمدى سول قويىلىمنىڭ بولشەگى سەزىنەمىن. رەجيسسەرمەن جانە اكتەرلەرمەن بىرگە دايىندىق جۇرگىزەمىن. سەبەبى، رەجيسسەر قاي جەردە قانداي ەموسيا بەرۋ كەرەكتىگىن ايتىپ وتىرادى. سولايشا مەن مىلقاۋ جاندارعا قويىلىمنىڭ كوڭىل-كۇيىن تۇتاس بەرىپ وتىرامىن" دەيدى ايدانا.
ول كوپشىلىكتىڭ ىستىق ىقىلاسىن شىنايى العىسىن جەتكىزدى. جىلاپ تۇرىپ راقمەتىن ايتىپ جاتقان ەرەكشە جانداردىڭ ريزاشىلىعىن كورىپ، ودان سايىن شابىت الىپ جاتقانىن جاسىرماي، تىلەك-نيەتىن دە ايتا كەتتى.
"ءاربىر العىسىن ايتىپ جاتقان جانعا راقمەتىم شەكسىز. ەڭبەگىمدى باعالاپ جاتقان ەرەكشە جانداردىڭ ءاربىر سەزىمىن، ىشكى ويلارىن ءبارىن كوزدەرىندەگى قۋانىشتان كورىپ، ءبىلىپ ءجۇرمىن. بۇل مەنى ودان سايىن شابىتتاندىرادى. الداعى ۋاقىتتا وسىنداي ۇلكەن كونسەرتتەردە مۇگەدەك جاندارعا، اسىرەسە ەستۋ قابىلەتىنەن ايىرىلعاندارعا جەڭىلدىكتەر قاراستىرىلسا دەيمىن. سەبەبى ءقازىر جاستار اراسىندا مۋزىكاعا اۋەستەنەتىندەر كوپ. ونىڭ ىشىندە مىلقاۋ كىسىلەر دە بار. ولاردىڭ سول نيەتىنە، "قوعامنىڭ تۇتاس بولشەگى بولايىنشى" دەگەن ءىلتيپاتتارىن ءبىز نازارسىز قالدىرماۋىمىز كەرەك" دەيدى ايدانا جاپاروۆا.