موڭعوليا استاناسى ۇلان-باتور قالاسىندا حالىق ۇكىمەتكە قارسى شەرۋگە شىقتى، دەپ حابارلايدى aqshamnews.kz.
تۇرعىندار ەلدە جەمقورلىقتىڭ كۇشەيگەنىنە نارازى. وعان قوسا الەۋمەتتىك ماسەلەلەر دە نازارعا ۇسىنىلدى. ماسەلەن، جولداعى كەپتەلىس، سالىقتى ازايتۋ، قالاداعى ءتۇتىندى سەيىلتۋ جايى كوتەرىلگەن. سۋحە-باتور اتىنداعى ورتالىق الاڭعا 3 مىڭداي ادام جينالعان.
Zindaa.mn باسىلىمىنىڭ جازۋىنشا، وسى وقيعاعا بايلانىستى استانادا 15 اۆتوبۋس مارشرۋتى توقتاعان. ورتالىق كوشەدە كولىك قوزعالىسى كىدىردى.
موڭعوليادا ۇيىمداستىرىلعان نارازىلىق اكسياسى بىرنەشە ساعاتقا سوزىلدى. الاڭعا جينالعان ادامدار بيلىك بەلگىلەگەن شامادا – جەرگىلىكتى ۋاقىت بوينىشا ساعات 17:00-دە تارقاۋى ءتيىس ەدى.
شەرۋگە شىققاندار پارلامەنت دەپۋتاتتارىن ۇكىمەتتى وتستاۆكاعا جىبەرۋدى تالاپ ەتتى. الاڭداعىلاردىڭ كەيبىرى ۇكىمەت كەڭسەسىنە شابۋىلداماق بولعان. ارنايى جاساق ولاردى توقاتتى.
ميتينگتى «ازاتتىق ءاليانسى» پارتياسى ۇيىمداستىردى.