ەندى ءموبيلدى اۋدارىمدار ءۇشىن دە سالىق تولەۋگە تۋرا كەلەدى
سەنات وسىنداي زاڭ جوباسىن قابىلدادى. ەگەر پرەزيدەنت وسى قۇجاتقا قول قويسا، كاسىپكەرلەر ءموبيلدى اۋدارىمدار ءۇشىن جەكە شوت اشۋعا مىندەتتى بولادى، دەپ حابارلايدى Almaty-akshamy.kz 24kz-كە سىلتەمە جاساپ.
جاڭا زاڭعا «ءموبيلدى تولەمدەر» تۇسىنىگى ەنگىزىلگەن. ەندى كليەنتتەر العان تاۋارلارىنىڭ اقىسىن، كاسىپكەرلەر اشقان الگى شوتتتارعا جىبەرەدى. بانكتەر دە سالىق ورگاندارىنا قاجەت اقپارات بەرۋگە مىندەتتى بولادى. زاڭ جوباسىن ازىرلەگەندەر پاندەميا كەزىندە وتانداستارىمىزدىڭ دەنى ءموبيلدى اۋدارىمدار ارقىلى ەسەپ ايىرىسىپ كەلدى دەيدى. ودان تۇسكەن تابىستان كاسىپكەرلەر سالىق تولەمەگەن. ال بۇل كولەڭكەلى تابىس بولىپ ەسەپتەلەدى. سوندىقتان دەپۋتاتتار مۇنى زاڭداستىرۋ قاجەت دەگەن باستاما كوتەرگەن.
«ماسەلەن، ءبىر ادامعا بىرنەشە ادامنان تۇراقتى تۇردە اقشا اۋدارىمدارى جاسالىپ تۇرسا جانە ول ءبىر اپتاعا، ءتىپتى ءبىر ايعا دەيىن سوزىلاتىن بولسا، بىردەن سالىق وگراندارى قىزمەتكەرلەرىنىڭ نازارىنا تۇسەدى. ونداي كەزدە ماماندار الگى ادامنىڭ نەمەن اينالىساتىنىن ءجىتى تەكسەرەدى. ءتىپتى بانكتەردەن قاجەت اقپارات الادى»، - دەدى ق ر قارجى ءمينيسترىنىڭ ورىنباسارى مارات سۇلتانعازييەۆ.