سالىق قىزمەتىنىڭ نازارىنا تۇسپەۋ ءۇشىن قازاقستاندىقتار 2024 جىلعى 1 قاڭتاردان باستاپ قانشا ءموبيلدى اۋدارىم جاساپ، قابىلداي الاتىنىن وڭىرلىك كوممۋنيكاسيالار قىزمەتىندە وتكەن بريفينگتە الماتىنىڭ مەملەكەتتىك كىرىستەر دەپارتامەنتىنىڭ وكىلدەرى حابارلادى.
كاسىپكەرلىك قىزمەتتى جۇزەگە اسىرۋ بەلگىلەرىن ايقىنداۋ ءۇشىن جەكە تۇلعانىڭ قاتارىنان ءۇش ايدىڭ ءارقايسىسى ىشىندە 100 جانە ودان دا كوپ رەت ءارتۇرلى تۇلعالاردان جەكە بانكتىك شوتقا اقشا قاراجاتىن الۋى كريتەرييى جەتكىلىكتى، دەپ حابارلايدى Almaty-akshamy.kz.
الماتىدا جالپىعا بىردەي دەكلاراسيالاۋدىڭ ءبىرىنشى كەزەڭىنىڭ قورىتىندىسى بويىنشا دەكلاراسيا تاپسىرعاندار سانى 46 مىڭنان استام جەكە تۇلعانى قۇرايدى. ەكىنشى كەزەڭ 2023 جىلى باستالىپ، وعان مەملەكەتتىك قىزمەتكەرلەر مەن ولاردىڭ جۇبايلارى، كۆازيمەملەكەتتىك سەكتور قىزمەتكەرلەرى مەن ولاردىڭ جۇبايلارى، 142 مىڭنان استام ادام تاپسىردى.
«2024 جىلدىڭ 1 قاڭتارىنان باستاپ جالپى دەكلاراسيالاۋدىڭ 3-كەزەڭى باستالادى، ياعني بيزنەس وكىلدەرى مەن ولاردىڭ جۇبايلارى، زاڭدى تۇلعالاردىڭ باسشىلارى، قۇرىلتايشىلارى (قاتىسۋشىلارى)، جەكە كاسىپكەرلەر جانە ولاردىڭ جۇبايلارى دەكلاراسيا تاپسىرۋعا مىندەتتى بولادى. بۇل مىندەتتەمە «ارەكەتسىز» نەمەسە قىزمەتىن ۋاقىتشا توقتاتىپ قويعان جەكە تۇلعالارعادا قاتىستى بولادى. الماتى قالاسى بويىنشا 3-كەزەڭدە 430 مىڭنان استام جەكە تۇلعا دەكلاراسيالانۋ قاجەت»، - دەدى الماتى قالاسى بويىنشا مەملەكەتتىك كىرىستەر دەپارتامەنتى ءتۇسىندىرۋ جۇمىسى جانە بايلانىس ورتالىعى باسقارماسىنىڭ باسشىسى ايجان بەكەيەۆا.
وسىعان بايلانىستى 2023 جىلى 2022 جىلدىڭ قورىتىندىسى بويىنشا مەملەكەتتىك كىرىستەر كوميتەتىنە ءۇش اي قاتارىنان جەكە بانكتىك شوتتارىنا ءار ءتۇرلى 100 تۇلعادان تۇسكەن اۋدارىمدار تۋرالى اقپارات كەلىپ ءتۇستى. بانكتەر تەك بەلگىلەنگەن كريتەرييلەرگە سايكەس كەلەتىن تۇلعالاردىڭ دەرەكتەرىن بەرەدى.
قازىرگى ۋاقىتتا اقپارات تەك مەملەكەتتىك قىزمەتكەرلەر مەن ولاردىڭ جۇبايلارى ءۇشىن 2022 جىلعا قول جەتىمدى.
بانكتەردەن اقپارات بەلگىلەنگەن كريتەرييلەر بويىنشا عانا كەزەڭ كەزەڭىمەن بەرىلەدى:
1) 2023 جىلدان باستاپ – 2022 جىلدىڭ قورىتىندىسى بويىنشا مەملەكەتتىك قىزمەتشىلەر، ولارعا تەڭەستىرىلگەن ادامدار جانە ولاردىڭ جۇبايلارى بويىنشا؛
2) 2024 جىلدان باستاپ – مەملەكەتتىك مەكەمەلەردىڭ، كۆازيمەملەكەتتىك سەكتور سۋبەكتىلەرىنىڭ قىزمەتكەرلەرى جانە ولاردىڭ جۇبايلارى بويىنشا 2023 جىلدىڭ قورىتىندىسى بويىنشا؛
3) 2025 جىلدان باستاپ – جەكە كاسىپكەرلەر، زاڭدى تۇلعالاردىڭ باسشىلارى جانە ولاردىڭ جۇبايلارى بويىنشا 2024 جىلدىڭ قورىتىندىسى بويىنشا؛
4) 2026 جىلدان باستاپ – 2025 جىلدىڭ قورىتىندىسى بويىنشا حالىقتىڭ قالعان ساناتتارى بويىنشا.
«بۇل جەردە جەكە تۇلعالار وزدەرىنىڭ جەكە ماقساتتارى ءۇشىن ءموبيلدى اۋدارىمداردى جاساي جانە قابىلداي الاتىنىن اتاپ ءوتۋ ماڭىزدى: بۇل تۋىستارىنا، دوستارىنا اۋدارىمدار، اتا-انالار مەن بالالارعا كومەك جانە باسقا دا ومىرگە قاجەتتى جاعدايلار. بۇل رەتتە مۇنداي اۋدارىمداردى دەكلاراسيالاۋدىڭ قاجەتى جوق، ويتكەنى مۇنداي اۋدارىمدار ءبىر جولعى بولىپ سانالادى»، - دەپ قوستى ايجان بەكەيەۆا.
سپيكەر بۇل شارالار جاسىرىن كىرىستەر مەن تىركەلمەگەن كاسىپكەرلەردى، اسىرەسە جەكە شوتتارعا ءموبيلدى اۋدارىمدار ارقىلى تولەم الاتىنداردى انىقتاۋعا باعىتتالعانىن ايتتى.
مەملەكەتتىك ورگاننىڭ وكىلدەرى كاسىپكەرلەرگە ارنايى بيزنەس-شوتتارعا تولەم قابىلداۋدى ۇسىنادى.
«باقىلاۋ شارالارى قىزمەتتى تىركەۋ جانە كىرىستى تومەندەتۋ بويىنشا كامەرالدىق باقىلاۋدى قامتيدى. جالپى، كامەرالدىق باقىلاۋ سالىق تولەۋشىلەرگە بۇزۋشىلىقتاردى ءوز بەتىنشە جويۋعا مۇمكىندىك بەرۋگە باعىتتالعان. وسىعان بايلانىستى انىقتالعان بۇزۋشىلىقتار تۋرالى اقپاراتى بار حابارلامالار جىبەرىلەتىن بولادى. ەگەر سالىق تولەۋشى بۇزۋشىلىقتارمەن كەلىسسە، ول جەكە كاسىپكەردى تىركەۋى نەمەسە دەكلاراسياعا دەكلاراسيالانباعان كىرىس سومالارىن (بۇزۋشىلىق تۇرىنە بايلانىستى) كورسەتە وتىرىپ قوسىمشا دەكلاراسيا تاپسىرۋى قاجەت»، - دەپ اتاپ ءوتتى ا.بەكەيەۆا.
بۇل رەتتە، ەگەر سالىق تولەۋشى بۇزۋشىلىقتارمەن كەلىسپەسە، وندا ول راستايتىن قۇجاتتاردى قوسا بەرە وتىرىپ، بۇزۋشىلىقتاردىڭ جوقتىعى تۋرالى تۇسىنىكتەمە بەرۋگە قۇقىلى.
حابارلامانى ورىنداماعان كەزدە سالىقتىق تەكسەرۋ تاعايىندالادى، ونىڭ بارىسىندا بانكتەردەن شوت بويىنشا تولىق اقپارات سۇراتىلادى جانە بۇزۋشىلىقتاردىڭ بولۋى/بولماۋى تۋرالى ءىس جۇزىندە شەشىم شىعارىلادى.
جاۋاپكەرشىلىك تۋرالى ايتا كەلە، سپيكەر تىركەلمەگەن جق قىزمەتى ءۇشىن 15-تەن 100 اەك-كە دەيىنگى ايىپپۇل تۇرىندە اكىمشىلىك جازا قاراستىرىلعانىن اتاپ ءوتتى. كىرىستەردى جاسىرعانى ءۇشىن – تولەنبەگەن سالىقتار سوماسىنىڭ 200% مولشەرىندە ايىپپۇل (قايتا بۇزىلعان جاعدايدا-300%). چەك بەرمەگەنى ءۇشىن-15-تەن 50 اەك-كە دەيىن.
مەملەكەتتىك كىرىستەر دەپارتامەنتى باقىلاۋ شارالارى ادال سالىق تولەۋشىلەرگە اسەر ەتپەيتىنىنە سەندىردى. باقىلاۋ شارالارى قىزمەتتى تىركەۋسىز جۇزەگە اسىراتىن نەمەسە كىرىستەردى جاسىراتىن كاسىپكەرلەرگە عانا اسەر ەتەدى.