تالاپتى بۇزعان تاسىمالداۋشى قازاقستان رەسپۋبليكاسىنىڭ زاڭىنا سايكەس جاۋاپقا تارتىلادى.
زاڭعا سايكەس تاسىمالداۋشى جولاۋشى الدىنداعى ءبىرقاتار جاۋاپكەرشىلىكتى ورىنداۋى كەرەك، دەپ حابارلايدى Almaty-akshamy.kz
اۋە رەيسىمەن ساپار شەككەندە ۇشاق ۋاقىتىنان كەشىكسە نەمەسە توقتاپ قالسا جولاۋشىعا زاڭ جۇزىندە وتەماقى تولەنەدى.
"قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى" زاڭىنىڭ 86-بابىنا سايكەس تاسىمالداۋشى جولاۋشى الدىنداعى ءبىرقاتار جاۋاپكەرشىلىكتى ورىنداۋى كەرەك.
تاسىمالداۋشىنىڭ مىندەتى:
جەتەگىندە جەتى جاسقا دەيىنگى بالاسى بار جولاۋشىعا انا مەن بالا بولمەسىن ۇسىنادى.
ەگەر رەيستىڭ جونەلتىلۋى ەكى ساعاتتان استام ۋاقىت كەشىكسە جولاۋشى حالىقارالىق بايلانىس جەلىسى بويىنشا قوڭىراۋ شالۋ نەمەسە ەلەكتروندىق پوچتا ارقىلى ەكى حابارلاما جىبەرۋگە قۇقىلى. ءبىراق قوڭىراۋ شالۋ ۋاقىتى 5 مينۋتتان اسپاۋ كەرەك.
سونداي-اق رەيستىڭ جونەلتىلۋىن ەكى ساعاتتان اسا كۇتكەن كەزدە سالقىنداتىلعان سۋسىندارمەن قامتاماسىز ەتىلۋى كەرەك.
رەيستىڭ جونەلتىلۋى ءتورت ساعاتقا، ءتىپتى ودان دا كوپ ۋاقىتقا كەشىكسە كۇندىزگى ۋاقىتتا - ءاربىر التى ساعات سايىن، ال تۇنگى ۋاقىتتا ءاربىر سەگىز ساعات سايىن تاسىمالداۋشى جولاۋشىنى ىستىق تاماقپەن قامتاماسىز ەتۋ كەرەك.
ەگەر رەيستىڭ ۇشۋى كۇندىز سەگىز ساعاتتان اسا جانە تۇندە التى ساعاتتان اسا كەشىكسە جولاۋشىلار قوناق ۇيگە ورنالاستىرىلادى.
قوناق ۇيگە اپارۋ جانە اكەلۋدى تاسىمالداۋشى ءوزى ۇيىمداستىرۋ كەرەك. بۇل ءۇشىن قالتاڭىزدان قارجى شىعارمايسىز جانە قوناق ۇيگە قوسىمشا اقى تولەمەيسىز.
تاسىمالداۋشىنىڭ تاعى ءبىر مىندەتى – رەيستەر وزگەرگەن جاعدايدا جولاۋشىلاردىڭ ۇيالى تەلەفون بايلانىسىنا حابارلاما جىبەرۋ جانە قانداي قىزمەتتەر كورسەتىلەتىنى تۋرالى اقپارات جىبەرۋ كەرەك.
رەيس 5 ساعاتتان استام كەشىكسە قانداي قىزمەت كورسەتىلەدى؟
تاسىمالداۋشىنىڭ كىناسىنەن رەيس بەس ساعاتتان استام ۋاقىتقا كەشىكسە تاسىمالداۋشى جولاۋشىنىڭ ءوز قالاۋىمەن بيلەتتە كورسەتىلگەن باعىتىنا جاقىن ارادا ۇشاتىن رەيسپەن جەتۋىن قامتاماسىز ەتەدى. بولماسا جولاۋشىعا بيلەتتiڭ تولىق قۇنىن قايتارۋعا مiندەتتi.
جولاۋشىسىن مەجەلى ورنىنا جەتكىزە الماعان تاسىمالداۋشى مەرزىمىن وتكىزىپ العان ءاربىر ساعات ءۇشىن بيلەت قۇنىنىڭ 3 پروسەنتىن ايىپپۇل رەتىندە تولەۋگە مىندەتتى. وندا دا تاسىمالداۋشى رەيستىڭ كەشىگۋى ەڭسەرىلمەيتىن كۇش سالدارىنان بولعانىن دالەلدەي الماسا تولەيدى. ايتپاقشى، ايىپپۇل سوماسىن ساتىپ الىنعان تاريف قۇنىنان اسىرۋعا بولمايدى.
ايىپپۇل جولاۋشىنىڭ وتىنىشىمەن تاسىمالداۋشىنىڭ ينتەرنەت-رەسۋرسى جانە بيلەتتەر ساتۋ پۋنكتتەرى ارقىلى جۇرگىزىلەدى.