مەرەكە كۇندەرى حيرۋرگتار كۇردەلى ترانسپلانتولوگيالىق وتالار جاسادى

استانادا ەلدىڭ ءار تۇكپىرىنەن كەلگەن ءۇش پاسيەنتكە ءبىر اعزا دونورىنىڭ ەكى بۇيرەگى مەن جۇرەگى ترانسپلانتاتتالدى، دەپ حابارلايدى Almaty-akshamy.kz.

ق ر دەنساۋلىق ساقتاۋ مينيسترلىگىنىڭ مالىمەتىنشە، مەرەكە الدىنداعى كۇنى ۇلتتىق عىلىمي ونكولوگيا ورتالىعى مەن استانا قالاسىنىڭ كارديوحيرۋرگيالىق ورتالىعىنىڭ ترانسپلانتولوگتارى، كارديوحيرۋرگتارى، انەستەزيولوگتارى مەن مەيىرگەرلەرى قۇرامىنداعى جوعارى بىلىكتى دارىگەرلەر توبى ساناۆياسيا بورتىندا پاۆلودار وبلىسىنا كەلدى.

سونىمەن قاتار، استانا قالاسىندا كۇتۋ پاراعىندا تۇرعان باعدارلامامەن ىرىكتەلگەن رەسيپيەنتتەر قوسىمشا تالداۋلار تاپسىرۋ ءۇشىن شاقىرىلدى.

مەديسينالىق زەرتتەپ-قاراۋدان ءوتۋ ناتيجەسى بويىنشا جانە كوميسسيانىڭ شەشىمى بويىنشا 26 جاستاعى رەسيپيەنت انىقتالدى. ول بۇيرەكتىڭ V تەرمينالدى ساتىسى دياگنوزىمەن 6 جىل بويى گەمودياليزدە بولعان.

استانا قالاسىنداعى ۇلتتىق عىلىمي ونكولوگيا ورتالىعىندا دارىگەرلەر ەرەسەك پاسيەنتكە كاداۆەرلىك بۇيرەكتى ترانسپلانتاتتاۋدى ءساتتى جۇرگىزدى.

رەسيپيەنت پالاتاعا اۋىستىرىلدى،بۇگىنگى كۇنى ونىڭ جاعدايى جاقسى. بۇيرەك تولىق جۇمىس ىستەپ تۇر.

ەكىنشى بۇيرەك بالاعا استاناداعى انا مەن بالا ورتالىعىندا ترانسپلانتاتتالدى.

ءۇشىنشى اعزا - جۇرەكتى ترانسپلانتاتتاۋ كارديوحيرۋرگيالىق ورتالىقتا جۇرگىزىلدى.