قازىرگى ۋاقىتتا قازاقستاندا اەس سالۋ ماسەلەسىنە قاتىستى ءتۇرلى پىكىرلەر ايتىلۋدا. كەيبىرەۋلەر «رەسەيلىك لوببي» تۋرالى ايتسا دا، بۇل جوبا ءۇشىن مەردىگەر تاڭداۋدا كەڭ مۇمكىندىكتەر بار ەكەنىن اتاپ وتكىم كەلەدى.
2019 جىلى الەمدىك جەتەكشى يادرولىق تەحنولوگيا جەتكىزۋشىلەرىنەن تەحنيكالىق-ساۋدالىق ۇسىنىستار الۋ بويىنشا ماركەتينگتىك راسىمدەر وتكىزىلدى. ناتيجەسىندە وڭتۇستىك كورەيا، جۇڭگو، رەسەي، اقش، فرانسيا سياقتى بەس شەت ەلدەن التى تانىمال كومپانيانىڭ 13 رەاكتور ءتۇرى بويىنشا ۇسىنىستارى الىندى. ءار رەاكتور قۋاتى، قۇرىلىمى جانە باسقا دا سيپاتتامالارى بويىنشا ءارتۇرلى بولدى.
ءبىز بۇل ۇسىنىستاردى 20 كريتەريي بويىنشا قاراستىردىق جانە ەڭ پەرسپەكتيۆالى نۇسقالاردى ىرىكتەپ، شورت-ليست جاسادىق. بۇل تىزىمگە ءتورت جوبا ەندى، ولار: قىتايدىڭ «CNNC» كومپانياسى (HPR-1000 رەاكتورى)، رەسەيدىڭ «روساتوم» كومپانياسى (ۆۆەر-1200 جانە ۆۆەر-1000 رەاكتورلارى)، وڭتۇستىك كورەيانىڭ «KHNP» كومپانياسى (APR-1400 رەاكتورى) جانە فرانسيانىڭ «EDF» كومپانياسى (EPR1200 رەاكتورى). قازىرگى ۋاقىتتا وسى كومپانيالارمەن اەس قۇرىلىسىنا قاتىستى شارتتاردى تالقىلاۋ بويىنشا كەلىسسوزدەر جۇرگىزىلۋدە.
سونداي-اق، فرانسيا پرەزيدەنتى ەممانۋەل ماكروننىڭ 2023 جىلعى قاراشا ايىندا قازاقستانعا ساپارى كەزىندە ەلىمىزدە اتوم ونەركاسىبىن دامىتۋ ماسەلەسى دە تالقىلاندى. ودان بولەك، قازاقستان مەن وڭتۇستىك كورەيا پرەزيدەنتتەرى 2023 جىلدىڭ ماۋسىم ايىندا اتوم ەنەرگەتيكاسىن بىرلەسىپ دامىتۋ پەرسپەكتيۆالارىن دا تالقىلادى.