الماتىدا تۋريستىك ەكسپەديسيالىق جاساقتاردىڭ رەسپۋبليكالىق «مەنىڭ وتانىم – قازاقستان» سلەتى ءوتتى. سلەتكە جالپى ورتا جانە قوسىمشا ءبىلىم بەرۋ ۇيىمدارىنىڭ استانا، الماتى جانە شىمكەنت قالالىق سلەتىنىڭ 57 240 جەڭىمپازى قاتىسىپ، ءوز وڭىرلەرىنىڭ وزىق تاجىريبەسىن ورتاعا سالدى. جالپى، وتكىزىلىپ وتىرعان سلەت بالالار مەن جاستاردىڭ بويىنا وتانعا دەگەن سۇيىسپەنشىلىكتى وياتىپ قانا قويماي، پاتريوتتىق سانا-سەزىمدى قالىپتاستىرۋدى ماقسات تۇتقان. ارينە، تۋريستىك سالانى ناسيحاتتاۋعا بەلسەنە قاتىسقان جاس ۇرپاقتىڭ سالاۋاتتى ءومىر سالتىن دا بەرىك ۇستاناتىنى انىق.
قازىرگى تاڭدا ەلىمىز بويىنشا تۋريزم سالاسى جان-جاقتى دامىپ كەلەدى. ارينە، ونىڭ دامىپ، گۇلدەنۋى بۇگىنگى مەكتەپ وقۋشىلارىنا، كەلەشەك جاس ۇرپاققا تىكەلەي بايلانىستى. سوندىقتان ەندىگى جەردە وسىنداي ەكسپەديسيالىق جاساقتار ءجيى باس قوسىپ، اتالمىش سلەت تۇراقتى وتكىزىلەتىن بولادى.
ءبىزدىڭ ەلىمىز دە الەم ەلدەرى سياقتى تۋريزم كۇنىن بەلگىلەپ، اتاپ وتۋدە. 1979 جىلى يسپانيالىق توررەمولينو قالاسىندا دۇنيەجۇزىلىك تۋريستىك ۇيىمىنىڭ باس اسسامبلەياسى «دۇنيەجۇزىلىك تۋريزم كۇنىن» بەكىتكەن ەدى. ال 1970 جىلدىڭ 27 قىركۇيەگىندە دۇنيەجۇزىلىك تۋريستىك ۇيىم جارعى قابىلداپ، ءدال وسى كۇن تۋريزم كۇنى بولىپ بەلگىلەنگەن بولاتىن. اتالمىش مەيرامدى اتاپ ءوتۋ ارقىلى ءتۋريزمدى دامىتىپ، ءتۇرلى مەملەكەتتەر اراسىنداعى قارىم-قاتىناستى نىعايتۋ كوزدەلگەن. سونىمەن قاتار، ءتۋريزمنىڭ ماڭىزدىلىعى مەن ونىڭ الەۋمەتتىك، مادەني، ەكونوميكالىق ءمانىن حالىقارالىق دەڭگەيگە جەتكىزۋ دە وسى مەرەكە اياسىندا قامتىلىپ وتىر. كەي مەملەكەتتەر ءۇشىن تۋريزم سالاسى وتە ماڭىزدى. ەڭ الدىمەن، ەكونوميكالىق فاكتور جانە مەملەكەتتىك بيۋدجەت كىرىسىنىڭ نەگىزگى كوزى بولىپ تابىلادى.
سوندىقتان، ءدال ءقازىر «دۇنيەجۇزىلىك تۋريزم كۇنىن» الەمنىڭ كوپتەگەن ەلى 30 جىلدان استام ۋاقىت اتاپ ءوتىپ كەلەدى. اتالمىش مەرەكە جىل سايىن بۇكىلالەمدىك تۋريستىك ۇيىم بەكىتكەن تاقىرىپ اياسىندا اتالىپ وتەدى. ارينە، ءدال وسى كۇنى تۋريزمگە ارنالعان جيىندار، بايقاۋلار مەن فەستيۆالدار وتەدى. الماتىدا وتكەن سلەت بارىسىندا قاتىسۋشىلار «ات ءتۋريزمى» جانە «تۋريستىك مارشرۋتتار» نوميناسياسى بويىنشا وزدەرىنىڭ زەرتتەۋ جۇمىستارىن قورعادى. ولار ات ءتۋريزمىنىڭ ەرەكشەلىگى، ونى تابيعاتپەن بايلانىستىرا دامىتۋ ءتاسىلى، بۇعان قوسا مادەنيەت پەن تاريحتىڭ جاڭا قىرلارىن اشۋعا قالاي كومەكتەسەتىنىن ايتىپ بەرەدى. سونداي-اق، بارلىق قاتىسۋشىلار تۋريستىك مارشرۋتتار تۋرالى ءوز بىلىمدەرىمەن ءبولىسىپ، تابيعي جانە مادەني مۇرانى ساقتاۋدىڭ ەل بولاشاعى ءۇشىن زور ماڭىزى تۋرالى ويلارىمەن ءبولىستى.
– سلەتكە قاتىسۋشىلار الماتىنىڭ تابيعاتىن، ءتۋريزمنىڭ ناعىز ورتالىعى ەكەنىن ايتىپ، ريزاشىلىقتارىن ءبىلدىردى. جاڭا ورتا تاۋىپ، وزدەرى قاتىسقان جارىستار مەن جورىقتارى تۋرالى تاجىريبەلەرىمەن ءبولىستى، – دەيدى وقۋشىلار سارايىنىڭ باسشىسى ايگۇل بولاتبەك قىزى.
الماتىدا باس قوسقان ەل جاستارى دا دومبىرا مەن گيتارانىڭ سۇيەمەلدەۋىمەن تۋريستىك اندەردى ورىنداپ، ءوز ونەرلەرىن كورسەتتى. سلەت جەڭىمپازدارى ارنايى ديپلوم مەن سىيلىقتارمەن، ال جەڭىمپازداردىڭ جەتەكشىلەرى العىس حاتپەن ماراپاتتالادى. بارلىق قاتىسۋشىلارعا سەرتيفيكات تابىستالادى. سلەتتىڭ جابىلۋ سالتاناتى وقۋشىلار سارايىندا ءوتتى.
