مەملەكەتتىك كەڭەسشى ۇلتتىق قۇرىلتايدىڭ بۋرابايدا وتكەن وتىرىسىندا پرەزيدەنت كوتەرگەن باستامالارى مەن بەرگەن تاپسىرمالارىن ورىنداۋعا قاتىستى جۇمىستى ۇيىمداستىرۋ بويىنشا جيىن وتكىزدى، دەپ حابارلايدى aqshamnews.kz
ەرلان قارين مەملەكەت باسشىسى ءوز سوزىندە ءمانى زور گۋمانيتارلىق، الەۋمەتتىك-ەكونوميكالىق، ينفراقۇرىلىمدىق جوبالار تۋرالى ايتقانىن جانە باسقا دا زاڭنامالىق سيپاتتاعى ءبىرقاتار ماڭىزدى تاپسىرما بەرگەنىن اتاپ ءوتتى.
مەملەكەتتىك كەڭەسشى جاۋاپتى ورگاندارعا پرەزيدەنتتىڭ باستامالارى مەن تاپسىرمالارىن جۇزەگە اسىرۋعا قاتىستى ناقتى قۇرىلىمى بار ءىس-شارالار جوسپارىن مۇقيات پىسىقتاپ، ازىرلەۋ تۋرالى تاپسىرما بەردى.
سونداي-اق جۇمىس سەكسيالارى مەن پلەنارلىق بولىگىندە قۇرىلتاي مۇشەلەرىنىڭ ۇسىنىستارىنا قاتىستى بولەك جوسپار ازىرلەۋدى تاپسىردى. ەرلان قارين پرەزيدەنت باستامالارىن جۇزەگە اسىرۋ تۋرالى ايتا كەلىپ، الداعى ۋاقىتتا اتقارىلاتىن بىرلەسكەن جۇمىسقا بارلىق مۇددەلى مەملەكەتتىك ورگاندار، قۇرىلتاي مۇشەلەرى، دەپۋتاتتار مەن ساراپشىلار بەلسەنە اتسالىسۋى قاجەت ەكەنىن ەرەكشە اتاپ ءوتتى.
مەملەكەتتىك كەڭەسشى پرەزيدەنت ۇسىنعان ءمانى زور جوبالار مەن باستامالاردى قوعام اراسىندا جانە اقپارات كەڭىستىگىندە ءتۇسىندىرۋ وتە ماڭىزدى دەدى. ال ءوزىنىڭ تەلەگرام ارناسىندا «بۋرابايدا وتكەن القالى جيىن بىرنەشە باستى ەرەكشەلىكتەرگە يە. پرەزيدەنت ءسوزى مازمۇنى مەن قۇرىلىمى جاعىنان جىلداعى جولداۋمەن پارا-پار» دەپ جازدى ەرلان قارين.