قازاقستاندىق مەملەكەتتىك-جەكەمەنشىك ارىپتەستىك ورتالىعى ورنىقتى دامۋ مەن سيفرلاندىرۋعا قوسقان ۇلەسى ءۇشىن حالىقارالىق ماراپاتقا يە بولدى
قازاقستاندىق مەملەكەتتىك-جەكەمەنشىك ارىپتەستىك ورتالىعى (ءمجا) بۇۇ ەۋروپالىق ەكونوميكالىق كوميسسياسىنىڭ (بۇۇ ەەك) قولداۋىمەن سەربيا استاناسى بەلگراد قالاسىندا وتكەن ءىح حالىقارالىق ءمجا فورۋمىندا حالىقارالىق ماراپاتقا يە بولدى. حالىقارالىق قازىلار القاسى ورتالىقتىڭ ورنىقتى دامۋ ماقساتتارى مەن سيفرلىق ترانسفورماسيا قاعيداتتارىنا سايكەس كەلەتىن ءمجا جوبالارىن ىلگەرىلەتۋگە قوسقان ۇلەسىن جوعارى باعالادى.
«بۇل ماراپات – بۇكىل كاسىبي ورتانىڭ بىرلەسكەن ەڭبەگىنىڭ ناتيجەسى. قازاقستان ءمجا تەتىكتەرىن حالىقارالىق ستاندارتتارعا ساي جەتىلدىرۋمەن قاتار، سيفرلىق تەحنولوگيالاردى ءتيىمدى ەنگىزۋ ارقىلى سالانىڭ ساپالى دامۋىنا جول اشىپ وتىر»، – دەدى «قازاقستاندىق مەملەكەتتىك-جەكەمەنشىك ارىپتەستىك ورتالىعى» اق باسقارما ءتوراعاسى اسلان قاليعازين.
ورتالىقتىڭ مالىمەتىنشە، 2006 جىلدان بەرى ەلىمىزدە جالپى 2،6 ترلن تەڭگە سوماسىنا 1100-دەن استام كەلىسىمشارت جاسالعان. جوبالاردىڭ نەگىزگى باعىتتارى – ءبىلىم بەرۋ، دەنساۋلىق ساقتاۋ، ەنەرگەتيكا جانە تۇرعىن ۇي-كوممۋنالدىق شارۋاشىلىعى بولىپ تابىلادى. بۇل رەتتە راسىمدەردىڭ اشىقتىعىنا، سىبايلاس جەمقورلىق تاۋەكەلدەرىن ازايتۋعا جانە ينۆەستيسيالىق تارتىمدىلىقتى ارتتىرۋعا باسا نازار اۋدارىلىپ وتىر. جوبالاردى كونكۋرستىق ىرىكتەۋ ءۇشىن ۆەب-پورتال ىسكە قوسىلىپ، تىكەلەي كەلىسسوزدەر جۇرگىزۋ تاجىريبەسىنە شەكتەۋ قويىلدى، ءمجا جانە كونسەسسيالار تۋرالى زاڭدار بىرىكتىرىلدى. جوبالاردى جۇزەگە اسىرۋ سانى بويىنشا تۇركىستان، شىعىس قازاقستان جانە اتىراۋ وبلىستارى كوش باستاپ تۇر.
ءمجا سالاسىنداعى نەگىزگى باعىتتاردىڭ ءبىرى – الەۋمەتتىك ينفراقۇرىلىمدى دامىتۋ. 2023 جىلعى قاراشادا ۇكىمەت 2024-2028 جىلدارعا ارنالعان ءمجا دامىتۋدىڭ كەشەندى جوسپارىن بەكىتتى. قۇجات ءبىلىم بەرۋ، دەنساۋلىق ساقتاۋ، سپورت جانە الەۋمەتتىك قورعاۋ سالالارىنداعى 43 جوبانى قامتيدى.